Hopp til innhold

Ruoššasámi studeanttat oažžuba oahpposaji

Sámi allaskuvlla sisaváldinlávdegoddi lea árvvoštallama vuođul dohkkehan ruoššasámi studeanttaid Aleksandra Artieva ja Arina Shaborshina ohcamiid lohkat sámegiela boahtte čavčča, duođašta Sámi allaskuvla NRK:i.

Artieva ja Shaborshina oaččuiga dieđu váldosisaváldimis ahte sudnos ii leat oahpposadji sámegiela ja sámi girjjálašvuođa 1 ohppui dan sivas go váilu formála eŋgelasgiella oahppu, ja nu eaba deavdde oppalaš lohkangelbbolašvuođa eavttuid.

Dál boahtá ovdan ahte Sámi allaskuvla bealis dáhkkui boasttuvuohta go ávžžuhii studeanttaid ohcat spiehkasteami láhkaásahusas, mii ii lean vejolaš oažžut go eaba deavdde daid gáibádusaid mat attáše vejolašvuođa spiehkastit sisaváldingáibádusain. Allaskuvlla álgomearrádus reálagelbbolašvuođa árvvoštallama hárrái maid dahkkui boasttu láhkadulkoma vuođul.

Studeanttat leaba dan maŋŋil ohcan oahpposaji reálagelbbolašvuođa vuođul man báikkálaš sisaváldinlávdegoddi dohkkehan.

– Allaskuvlla bealis lean dál hui ilus go mii nagodeimmet gávdnat čovdosa, vaikko lea moalkái leamaš. Šállošan sakka go mis lea leamaš heajos diehtojuohkin ja bagadallan makkár sisaváldingáibádusat gustojit ja mii de fas lea dagahan eahpesihkkaris dili studeanttaide, dadjá direktevra Anne-Marie Gaino.