Sámediggeráđđi čuoččuha bággolohkan mávssii 17 miljovnna
Boazoáiddit eai divvojuvvo, ođđa doaibmabijut maid Stáhtahálddašeaddji doaimmaha eai álggahuvvo, boazoeaiggádiid áššit eai meannuduvvo ja ruđat eai mákso. Nu lea dilli Finnmárkku boazodoalus, čállá iFinnmark.
– Buot lea bissánan. Leaš dal jođihandoarjja, siidaoassedoarjja ja buot eará ohcamat maid stáhtahálddašeaddji galggašii meannudit. Stáhtahálddašeaddji muitala sivvan dasa lea go leat geavahan buot ruđaid bággolohkamiidda Lágesduottar orohagas. Lean gullan bággolohkamat mákse 17 miljovnna kruvnna, lohká sámediggeráđđi Hans Ole Eira iFinnmark áviisii.
Stáhtahálddašeaddji boazodoalloossodaga direktevra Sunna Pentha duođašta ahte sii leat geavahan mealgat eanet ruđaid go lei várrejuvvon lohkamiidda, muhto ii muital justa man olu ovdal go leat geargan árvvoštallat ášši.
Pentha čilge maiddái ahte ii leat dušše bággolohkan mii lea sivvan dasa ahte ohcamiid meannudeapmi lea maŋŋonan, nugo Eira čuoččuha. Earret eará guohtunroasu geažil leat šaddan meannudit olu heahteruđa ohcamiid.