Sámi leavga 36 jagi

Odne lea 36 jagi áigi dassá go sámi leavga dohkkehuvvui Åres Ruoŧas sámiid 13. konferánssas jagis 1986. Dan áigge áviisačállosiid mielde ledje 24 leavgaárvalusa ja guovtti dain árvalusain meannudedje konferánssas, čállá Nationálabibliotehka sin Facebook-siidus.

Vuosttas leavgaevttohusa sámi leavggas hábmii dáiddár Synnøve Persen jagis 1977. Leavga geavahuvvui vuosttas geardde Álttás elfápmohuksema vuostálastimiin.

Sámiráđđi almmuhii sámi leavgga hábmengilvvu, man vuittii dáiddár Astrid Båhl. Váldofáddá lea vižžojuvvon meavrresgáris ja lullisámi Anders Fjellner divttas «Paiven parneh» («Beaivvi bártnit»). Dán divttas govvida Fjellner sápmelaččaid beaivvi bárdnin. Leavgga gierdu govvida beaivváža ja mánu, čállá Sámediggi iežas neahttasiidduin.