Kuhmunen okta davviriikkaid deháleamos dálkkadatváikkuheddjiin

Vogue Scandinavia namuha Sara-Elvira Kuhmunena ja Sofia Jannoka davviriikkaid gávcci njunuš dálkkádataktivistta searvái. Jannok geavaha Vogue mielde beaktilit sosiála media vuosttildit ruvkkedoaimmaid boazodoallo guovlluin. Sáminuorra jođiheaddji Kuhmunena birra Vogue čállá, ahte son lea okta deháleamos olbmuin geat dáistalit ruvkkedoaimmaid vuostá.

Sara-Elvira Kuhmunen lohká, ahte su mielas lea somá ahte Vogue Scandinavia lea válljen sápmelaččaid oassin sin artihkalii ja nu besset sámit maid leat oassin doppe. Kuhumunen lasiha, ahte dat mii máilmmis dáhpáhuvvá dál váikkuha eatnamii ja nu sápmelaččaid eallimii. Sara-Elvira Kuhmunen ii lohkan vuordit ahte Vogue Scandinavia váldá sutnje oktavuođa.

Kuhmunen lokte dálkkadatáššiid Sáminuora čoahkkimiin ja eará dáhpáhusain maid son dasto juogada sosiála mediaiin. Sutnje lea dehálaš juogadit dálkkádatáššiid, dasgo son boazosápmelažžan oaidná olu rievdadusaid. Sutnje lea dehálaš ahte su ja Sáminuora bargu lea váikkuhan olbmuide. Mannan giđa Kuhmunen čalmmustahttii sosiála median olu dan, go Ruoŧa ráđđehus galggai mearridit Gálloka ruvkke birra. Sutnje lea dehálaš ahte earát go sápmelaččat besset oaidnit mo Ruoŧa stáhta láhtte.

Eará namuhuvvon njunuš dálkkadataktivisttat Davviriikkain leat Vogue Scandinavia mielde norgalaš Gina Gylver gii jođiha Natur of Undgom searvvi, ruoŧŧetlaš Isabelle Axelson gii joatká Greta Thunberga álggahan Fridays for Future dáhpáhusaid lágideami, ruoŧŧelaš Lina Burnelius gii lea njunnožis Protect the Forest searvvis, ruoŧŧelaš Emma Sundh gii jođiha sorjjasmeahttun Klimatklubbena, ruoŧŧelaš Linna Gadde gii maid oassálasta Fridays for future dáhpáhusaid lágidemiide ja suopmelaš Sommer ackerman gii bealustá eanandoalu ja vuvddiid.