Politiija dutkagoahtá guovžža báhččima
Nuorta -Finnmárkkus Deanus lea ikte eahkedis báhččon guovža. Navdimis báhče guovžža heahtegádjumis go guovža galgá leat fallehan sávzzaid. Boles lea dál dutkamin leago dát báhčin leamašan heahtegádjun.
Deanu gieldda ovdánahttinossodaga doaibmajođiheaddji Frank Martin Ingilæ muitala ahte báhčči lea ieš almmuhan bolesii ahte lea báhčán guovžža.
Borgemánu 5. beaivve lei bivdojoavku ožžon lobi báhčit dán guovžža mii lea speadjan sávzzaid Deanus Máskevári guovllus ja lahkosis.