Badjel 60 bohcco vuddjo togii
61 bohcco vuddjo togii olggobeale Johkamohkki Ruoŧa bealde lávvardaga, čállá Ávvir áviisa.
Udtja čearu ságadoalli, Rune Stokke, dadjá Ávvirii ahte sii ledje dieđihan togafitnodahkii, man toga «Inlandsbanan» dušše vuodjá geasi áigge turismma geažil, ahte ledje bohccot ruovdemáđii láhkosis.
– Mii geahččaleimmet doallat bohccuid eret ruovdemáđis. Muhto leat unnán olbmot čearus ja dál leimmet mearkume misiid eará báikkis, muitala son.
Stokke dadjá Ávvirii ahte togafitnodaga hoavda šálloša ja lohpida unnidit toga leavttu dán báikkis. Togafitnodat máksá buhtadusa čerrui, dadjá Stokke.
