Mierkki gå la 300 jage dallutjis gå sån Divtasvuonan lij

– Sámijn lij dal ietjasa åssko juo dålutjis, ja dav de gåtsedin. De dal galggin risstiduvvat báhkenav ierit rájatjit. Stáhtalasj misjåvnnåsiebrre Københámnan ásaduváj, ja danna de báhppa Thomas von Westen (1682-1727), oattjoj njunjos virgev, ja nuorttalij guovlluj manát gånnå de garrasit sáme dålusj åskov vuosteldin. Siejde ja goabdá biejsteduvvin, guhkken ierit dálásj religiøsa ideálajs friddjavuodan jáhkket masi ajtu sihtá.

Dav tjállá Divtasvuona histåvrråsiebre gå de gåhttju seminárraj ja lågådallamijda jur báhpa Thomas von Westena birra. Lågådallama lij biejadum bårggemánnuj 30. biejve Gásluovtan mij dálla la Áhkánjárga suohkanin.

Bårggemáno 26. biejve rájes gita 31. bæjvváj jagen 1722 lij Thomas von Westen Gásluovtan misjåvnå dåjmajt jåhtuj biejatjit.

Histåvrråsiebre dal seminárraj gåhttju gå la jur 300 jage dallutjis gå Thomas von Westen lij dajn bájkijn.

Lågådallij gaskan libá dagu åvdep professåvrrå Alf Ragnar Nilsen, ja bájkálasj historihkkár Hilgunn Pedersen guhti de galggá Jens Kildale birra ságastit.