Sámi dáidda eanet oidnosii Norggas

Sámi dáidda ii leamašan nu olu oidnosis Norgga našunálamuseas. Go ođđa musea rahppo geassemánu 11. beaivve de lea rahpančájáhusas maiddái sámi dáiddáriid dáidagat mielde. Kuráhtor Randi Godø mieđiha, ahte leat dán rádjai unnán deattu bidjan sámi dáidagii museas. -Dál leat sii oastigoahtán eanet sámi dáidaga ja dát lea dál dehálaš lávki sidjiide, dadjá Godø. Son mieđiha maiddái, ahte sis ii leat nu nanu diehtu ja máhtu sámi dáidagis. Sámi paviljoŋŋa rahpamis Venetsias cuigiide dáiddár Synnøve Persen, ahte Norgga dáiddainstituhtat eai ane árvvus sámi dáidaga ja máilmmis sámi dáidda lea measta eanet dovddus go Norggas. -Ođđa stuorát lanjat dahket dál vejolažžan oastit eanet dáidaga ja sámi perspektiiva maid lea eanet oidnosis, dadjá Godø. Musea «Jeg kaller det kunst»-rahpančájáhusas leat mielde sámi dáiddáriid dáidagat ja dát čájáhus lea oaidnimis geassemánu 11. beaivvis gitta čakčamánu 11. beaivvi rádjai.