Bånndura jáhkki doajvov boahtteájggáj vaddá

Tjoahkkáj oadtju bånndura 10,9 millijárda kråvnå dán jagásj ednambarggosjiehtadusán stáhtajn. Bånndurij gájbbádus lej 11,5 millijárda, ja stáhtta fálaj 10,16 millijárda kråvnå.

Ednambarggoministar Sandra Borch javllá gårne, sávttsa ja båhtjemgusá li suorge mav de ráddidus vielet.

– Dat vuoset gåktu ráddidus ednambargov dán rijkan vielet, javllá Borch.

Vuonarijka båndorlihto jådediddje Bjørn Gimming la dudálasj gå de vijmak ájgás båhtin, ja javllá dát la vuostasj oasse dan måttsåstimbargguj masi l dárbbo.