Krogh gearggus vuolgit Olympia gilvvuide

Norgga čuoiganriikajoavkkus leat koronanjoammumat ja dat dagahit eahpesihkkarvuođa boahtte vahkku olympiagilvu oasálasttima várás . Ikte čielggai ahte guovtti nissončuoigis lea koronavirus. Langrenn.com čujuha, ahte finnmárkulaš Finn Hågen Krogh lea vejolaš evttohas beassat olympia gilvvuide mielde, jos almmáiolbmuid čuoiganriikajoavkkus muhtin ii beasa gilvalit korona geažil. Krogh lohká iežas leat gearggus jos datte beassá vuolgit Pekingii go dasa lea son hárjehallan go gilvvut leamaš su váldomihttu. Olympia gilvvut álget Pekingas Kiinnás boahtte vahkus guovvamánu 2. beaivve ja bistet guovvamánu 20. beaivái. Almmolaš rahpan lea guovvamánu 4. beaivve.