Guoktásis korona Sámedikkis

Sámedikki dievasčoahkkimis Álttás lea dál guovtti olbmos positiiva koronaiskkus. Buot čoahkkinoassálastit ávžžuhuvvojit válddihit iskosiid. Dušše sii, geat iskosa váldet, besset dievasčoahkkinlatnjii. – Sámediggi lea dál dieđihan sihke Álttá suohkanii ja Scandic hotellii njoammuma birra, muitala sámediggedirektevra Inger Marit Eira-Åhrén. – Mii leat álggahan doaimmaid, buohkat fertejit geavahit njálbmesuoji ja doalahit mehter gaskka. Maiddái publikum ferte čuovvut nationála ja báikkálaš njuolggadusaid, dadjá Eira-Åhren. Čoahkkinjođiheaddji Tom Sottinen muitalii dievasčoahkkima joatkašuvvat fysalaččat, dassá go eará diehtu boahtá gielddadoaktáris. Sullii 70 olbmo čuvvot dievasčoahkkima Álttás.