NRK Meny
Normal

Nuppát divisjåvnån tjievtjaj

Dá ájllega julevsábme Adrian Mikkelsen vuostasj bále nuppát divisjåvnån tjievtjaj.

Adrian Mikkelsen

Adrian Mikkelsen la Harstad ILa mållagáhttár.

Foto: Arnt Børge Trane

– Muv mielas buoragit manáj, valla gávkas gå maŋŋutjissaj vuojtádalájma. Diedáv mån máhtáv buorebut tjiektjat, valla ij la læhkám nav ållo tjiektjamhárjjidallam, javllá divtasvuonak ja julevsábme Adrian Mikkelsen.

Adrian Mikkelsen

Adrian Mikkelsen lij FA Sápmi mållagáhttár ConIFA-gilppusin.

Foto: FA Sápmi

Gåk NRK åtsådallá de la Mikkelsen nuppát julevsábme gut nuppát divisjåvnån la tjiektjam. Ælla ájn aktak bajep dásen tjiektjam.

Sån gut suv åvddåla nuppát divisjåvnån tjievtjaj lij Lars Filip Paulsen. Goappátja libá aj sámij rijkajuohkusin tjiektjam, valla Mikkelsen la aj Bodø/Glimta åvdås vuostasj divisjåvnån sadjásasj mållagáhttár læhkám.

Åvddånahttem

Lars Filip Paulsen

Lars Filip Paulsen la aj nuppát divisjåvnån tjiektjam.

Foto: Harrieth Aira

Lars Filip Paulsena mielas la Adrian tjiehpes mållagáhttár.

– Muv mielas la huj suohtas vuojnnet gå oadtju Harstada åvdås tjiektjat. Suohtas la gullat gå bájkálasj nuora máhttelisvuodav oadtju alep dásen. Sávadahtte Harstada la dåssju lávkke suv åvddånahttemin ja rahtjalisvuoda diehti ájn guhkebuv jåkså.

Harstadan

Adrian Mikkelsen dá giese ådå tjiektjamjuohkusij álgij.

– Harstad ILa åvdås tjiektjagåhtiv danen gå sijá mållagáhttár oarjás jådij. Dálven lidjiv juo sijá siegen hárjjidallamin ja danen muv juohkusij sihtin. Dálla besav tjiektjat, mij la muv mielas ájnnasamos.

Duodalasj nuorra

Harstad ILa hárjjidalle juo guovvamánon Mikkelsenav Harstada tjiektjamjuohkusij sávaj.

– Adrian la duodalasj nuorra gut åvddånahttet sihtá. Sujna li juo Bodø/Glimtas åtsådallama ja le Stájgo A-juohkusa åvtås tjiektjam. Juska le nav nuorra de li sujna ållo buorre åtsådallama, javlaj Tor Arne Jakobsen guovvamánon NRKaj.

Agev berustam

Adrian Mikkelsen la agev tjiektjamav berustam, ja mujtustallá mánnávuodav ietjas giessesijdan.

– Mujtáv gå mánnán gietten Vuodnabadán tjievtjajma. Ja dan maŋŋela lav Tromsø ja Ájluovta juohkusij åvdås ålles mánnávuodav tjiektjam. Gå valástallamjoarkkaskåvllåj álggiv de Stájgo åvdås guokta jage tjiektjiv ja Bodø/Glimta siegen guokta jage tjiektjiv. Ja dálla lav Harstadan.

Gåktu boahtteájge sjaddá ij sån rat diede.

– Lav gåjt usjudallam dáv jagev Harstada åvdås tjiektjat ja vuojnnus gåk de sjaddá.