NRK Meny
Normal

Aitto válljejuvvon jođiheaddji: – Hui buorre dovdu

– Lea mearehis buorre dovdu go lean guhkit áigge juo ráhkkanan beassat jođiheaddjin, dadjá Bargiidbellodaga nuoraidorganisašuvnna AUF áitto válljejuvvon jođiheaddji, Håkon Kristian Haldorsen.

Håkon Haldorsen

– Áiggun ovddidit sámepolitihka, lohká ođđa AUF Finnmárkku jođiheaddji.

Foto: Håkon Haldorsen

17-jahkásaš Håkon Kristian Haldorsen lei ovddit áigodagas AUF fylkkastivralahttu ja nu leatge sus čielga mihtut ođđa doaimmaide.

– Mun áiggun nannet Finnmárkku AUF, nannet miellahttooktavuođaid ja muđui organisašuvnna.

Mannan vahkkoloahpa AUF Finnmárkku jahkečoahkkimis dat Haldorsen válljejuvvui jođiheaddjin.

Håkon Haldorsen

Aitto válljejuvvon jođiheaddji, Håkon Kristian Haldorsen.

Foto: Håkon Haldorsen

Ovddidit sámepolitihka

Haldorsen lohká maid áigut ovddidit sámepolitihka.

– Mii áigut válljet ovtta áirasa sámepolitihkalaš ráđđái, guldalit ja vuhtiiváldit maid sámiálbmot muitala. Čoavdit váttisvuođaid bastin dihte buoremusat ovddidit sámivuođa vai mis lea albma ja nana politihkka.

Álttá bárdni muitala ahte leat máŋga ášši mat sutnje leat erenoamáš dehálaččat. Earret eará dáhtošii son buoret psyhkalaš dearvvašvuođafálaldaga nuoraide.

Okta mu váibmoáššin leage ahte nuorain galgá šaddat geahppaseabbon leat lossadilis.

Finnmárkku AUF áiggošii ásahit lávdegotti mii politihkalaččat bargá buoridit fálaldaga mii guoská psyhkalaš dearvvašvuhtii.

Finnmark AUF

Jienasteapmi AUF jahkečoahkkimis mannan vahkkoloahpa.

Foto: Håkon Haldorsen

Fylkkastivra

  • Jođiheaddji: Håkon Kristian Haldorsen, AUF Áltá.
  • Politihkalaš nubbinjođiheaddji: Guro Vollan Nilsen, AUF Davvenjárga.
  • Organisatoralaš nubbinjođiheaddji ja ekonomiija ovddasvástádus: Ørjan Pedersen, AUF Hámmárfeasta.

  • Stivralahttu geas lea dásseárvu- ja searvadahttinovddasvástádus: Ulrika Louisa Snowden, AUF Guovdageaidnu.
  • Stivralahttu geas lea biras- ja dálkkádatovddasvástádus: Jan Egil Høgden, AUF Kárášjohka.
  • Stivralahttu geas lea riikkaidgaskasaš ovdasvástádus: Thomas Grønnli Pettersen AUF Áltá.
  • Áirras Finnmárkku Bargiidbellodahkii: Håkon Kristian Haldorsen, AUF Áltá.
  • Riikastivrii: Håkon Kristian Haldorsen, Guro Vollan Nilsen.