NRK Meny
Normal

Nuorra nieida stuorra lávddis

Nuorra nieida lea beassan neavttašit stuorit teáhterlávddis, ja lea vásihan olu gehččiid. Dát movttiidahttá su vel eanet šaddat neavttárin.

Peter Pan bihtás neavttašii Katja Rávdná Broch Pedersen Minstena.

Peter Pan bihtás neavttašii Katja Rávdná Broch Pedersen Minstena. Govas oaidnit Katja Rávnná alit báiddiin ja ruktá buvssat.

Foto: Hålogaland Teater

Katja Rávdná Broch Pedersen lea dál oassálasttán Hålogalándda Teáhtera teáhterbihtás «Peter Pan». Katja neavttasii «Minstena» dán bihtás olles 15 geardde. Iežas muitala vázzit nuppi jagi Kongsbakken joatkkaskuvllas Tromssas. Ja sii, oahppit drámalinjás, ledje nu lihkkui ahte besse searvat Hålogalandda Teáhterii neavttašit «Peter Pan» bihtás.

Nuorra nieida neavttašan lávddis 12 jagi

Katja Rávdná Broch Pedersen etnoinnis Dag Broch Johanseniin

Katja Rávdná Broch Pedersen etnuinnis Dag Broch. Ná soai illudeaba go Katja Rávdná lihkostuvai lávddis.

Foto: Priváhta

Katja Rávdná Broch Pedersen lea 17 jagi boaris. Iežas muitala ollu jagiid leamaš oahppin Deanu kulturskuvllas, ja doppe lea Ebba Joks leamaš su oahpaheaddji. Katja Rávdná lea leamaš máŋggaid teáhterbihtáin mielde Deanu Kulturskuvllas. Ja lea maid teáhterbihtáiguin beassan mátkkoštit olu guovlluin, ja vel olgoriikkasge. Katja Rávdná muitala Deanu kulturskuvllas oahppan olu, ja doppe son gal lávdáige lea hárjánan.

Danne ii lean nu váttis searvat Hålogalándda teáhterbihttái, ja dát bihttá dat gal easka movttiidahttá su šaddat neavttárin.

Stuorimus sávaldat šaddat ámmát neavttárin

Nuorra nieidda stuorimus sávaldat lea oahppat ain eanet teáhterbarggus, oahppat vel buorebut neavttašit, danne háliidivčče vuolgit teáhterohppui olgoriikii. Katja Rávdná Broch Pedersen rámida Deanu kulturskuvlla oahpaheaddji Ebba Joks, go son dat lea oahpahan su ráhkistit teáhterlávddi.

Kulturskuvlla oahpaheaddji rámida Katja Rávnná

Ebba Joks

Ebba Joks illuda go Katja Rávdná nu čehpet neavttašii Peter Pan bihtás Hålogalándda teáhteris. Son beare fertii fitnat Tromssas geahččamin su.

Foto: Nils Henrik Måsø / NRK

Ebba Joks finaige geahččamin iežas ovddaš oahppi Katja Rávnná, Hålogalándda teáhterlávddis. Ebba muitala iežas illudan go oinnii man čehpet Katja Rávdná neavttašii lávddis.

Iežas lohká leat oalle vissis dasa ahte Katja Rávnnás leat buorit vejolašvuođat beassat viidáseappot teáhterskuvllaohppui, go son lea hui čeahppi lávddis go čájeha iešguđetge karakteraid. Ebba Joks lohká maid ahte Katja Rávdná dieđusge sáhttá vaikke makkáraš bargguide oahppat, go son lea viššal ja áŋgir go lea oahppamin ođđa bargguid.