NRK Meny
Normal

Nuorra badjeolmmoš sáhttá gomihit olles Norgga boazodoallolága

– Dát lea dat deháleamos ášši áiggi čađa mii guoská boazodollui, dadjá professor, gii measta juo dáhkida ahte ášši gártá gitta alimusriektái – jos stáhta vuoittáhallá.

Trond Biti og Jovsset Ánte Sara

GERGOSAT BEALUŠTIT: Otne álggii guovdageaidnulaš Jovsset Ánte Sara (25) boazologoášši Norgga stáda vuostá, Hålogalándda lágamánnerievttis Tromssas. Dá iežas advokáhtain Trond Bitiin (gurut bealde).

Foto: Liv Inger Somby / NRK

– Mus lea stuorra doaivva ahte manná bures. Jovsset Ánte Saras lea buorre ášši, muhto lea han dal vuos dan duohken ahte mo lágamánneriekti geahččá «"jus'a» ja fáktaid.

Nu dajai Sara bealušteaddji Trond Biti, ovdal go diggi álggii eske iđđes.

Norgga stáhta dat lea gáibidan ahte Jovsset Ánte Sara geahpida ealustis 75 heggii. Sus lea leamaš gaskal 150 ja 300 bohcco (čujuhus dárogielartihkkalii).

Jovsset Ánte Sara i kofte

DIKKIS: Advokáhta Ingar Nikolaisen Kuoljok, Jovsset Ánte Sara, professor Ivar Bjørklund ja Sara advokáhtta Trond Biti.

Foto: Liv Inger Somby / NRK

Áitá dálá boazodoallopolitihka

Jovsset Ánte Sara ii oainne alddis vejolašvuođa birget dušše 75 bohccuin, ja danin áššehuhtii Sis-Finnmárku diggegoddi su njukčamánus diibmá.

Stáhta guoddalii duomu, ja danin deaivvadit fas áššebealit dál Hålogalándda lágamánnerievttis.

Professor Ivar Bjørklund, guhte lea 70-logu rájes čuvvon boazodoallodiggeáššiid, dadjá ahte jus stáhta vuoittáhallá dán áššis, de duššindahká dat stáda boazodoallopolitihka.

Jáhkkimis guoddaluvvo – vel oktii

Jos Jovsset Ánte Sara vuoitá eiseválddiid badjel, de mearkkaša njulgestaga «jápminduomu» stáhta boazodoallopolitihkkii, oaivvilda professor Bjørklund.

– Dalle han čájehuvvo ahte Norgga stáhta boazodoallopolitihkka lea doaibman áibbas boasttu eavttuiguin, dadjá son, ja joatká:

– Dát lea dat deháleamos ášši áiggi čađa mii guoská boazodollui. Measta juo dáhkidan ahte ášši gártá gitta alimusriektái, dadjá professor Bjørklund.

– Lea sáhka opmodatrievttis

Aili Keskitalo

ATNÁ DEHÁLAŠ ÁŠŠIN: Norgga Sámiid Riikkasearvvi parlamentáralaš jođiheaddji ja ovddeš Sámediggepresideanta Aili Keskitalo lea čuovvumin dikki Romssas.

Foto: Liv Inger Somby / NRK

Aili Keskitalo mielas lea gelddolaš ášši, sihke politihkalaččat ja maiddái vuoigatvuođaid hárrái.

– Dás han lea rievtti mielde sáhka boazodoalu vuoigatvuođain – ahte geat galget mearridit, ja mo boazodoalu sáhttá stivret. Lea han maid sáhka opmodatrievttis, ja das han lea nana vuođđu Norggas ja Sámi servodagas, dadjá Keskitalo.

– Jos Jovsset Ánte Sara vuoitá áššiin, de han son sáhttá gomihit olles Norgga boazodoallolága, lasiha son.

Guoddalanášši bistá golbma beaivve, ja loahpahuvvo duorastaga dán vahku.

Jovsset Ánte Sara-ášši

DIEVVA SÁLA: Hålogalándda lágamánneriekti fertii eske iđđes sirdit diggeášši stuorát latnjii, go nu ollosat ledje boahtán čuovvut guoddalanášši.

Foto: Liv Inger Somby / NRK

Ákšunerejedje

Ákšunisttat geat leat dan nu gohčoduvvon «Pile o'Sápmi»-nammasaš dáidaga duohken, fuomášuhtte iežaset oainnu sierra Facebook-videoin ovdalgo diggeášši álggii.

Sii leat cealkán doarjaga Jovsset Ánte Saraii, ja dorjot su iešguđetlágan dáidagiid ja loaiddastemiid bokte.

Dáiddár Maret Anne Sara, gii lea Jovsset Ánte Sara oabbá, dat lea «Pile o'Sápmi» njunuš.