Nuorat čohkájit Porsáŋggu girjerádjosa beavdeguorain Leavnnjas. Viđas mojohallet dihtoriid duohken. Rogget dihtoris čállinprográmma.Orrot sáhkki, čalmmiin báitá čearggusvuohta. Sii leat vuolgán oahppat čállit ráppateavsttaid sámegillii ja ráhkadit beat'a.
Storm Grøtta lea dušše 11 jagi. Son lea nu ilus go dákkár bádji lea Leavnnjas go ieš ruovttus láve sehkket beataid ja almmuhit daid youtubei.
– Dát bádji lea leamaš áibbas somá. Jos livččii dákkár bádji fas dáppe Leavnnjas, de livččen buohkaid avžžuhan dohko vuolgit, lohká Storm.
Miela mielde
– Ulbmil lea nannet nuoraid sámegiela dáppe Finnmárkkus. Dat lea dehálaš go sámegiella lea eanet aht` eanet jávkamin. Dáruiduhttin lea dahkan stuorra hávi min gillii. Ja mun háliidan dahkat sámegiela stuorisin fas, nannet sámegiela, dadjá Duolva Duoddara Fred-René Buljo.
Son dat lea boahtán oahpahit nuoraide ráppema. Su mielas lea áibbas lunddolaš ráppet sámegillii. Ráppa čađa beassá doalahit iežas identitehta ja giela.
– Mun álgen dainna prošeavttain danin go mun háliidin oahpahit nuoraid ja danne go áŋggaštan hip hopii ja dieđusge hálddašit min giela, sámegiela. Dat lea hui dehálaš munnje, joatká Fred.
Šattai dárogillii
Dán vuoro ii meinnestuvvan oahpahit nuoraide sámegilli čállit teavsttaid go eai boahtán sámegielat nuorat Leavnnja bargobádjái. Ja dan dáfus šattai visot dárogillii.
– Dáppe ii hála earágo okta sámegiela nu ahte mii eat bija dan dási nu bajás dál. Mii eat daga dán nu váttisin otne.
Kárášjogas serve ráppa bádjái olles njealljenuppelot nuora, Guovdageainnus gis dušše golmmas. Muhto Fred lea duhtavaš.
– Dat lei hui somá. Mii dagaimet dan maid galggaimet, ráhkadeimmet lávlagiid sámegillii, ja oahpaimet čállit teavsttaid ja mikset ráppašuoŋaid, dárkkista Buljo.