- Leamaš hui erenoamáš beaivi, ollu iešguđegelágan dovddut. Lossat dasgo lean massán nu máŋga ustiba. Liikká leamaš hui fiinna beaivi go lean beassan fas dovdat oktavuođa eará AUF nuoraiguin, dadjá Stine Marie Høgden (18), Kárášjoga AUF jođiheaddji.
Ikte, beaivvi ala jahki maŋŋel suoidnemánu 22. beaivvi dáhpáhusaid leat Stine ja máŋga čuođi eará AUF lahtu ruovttoluotta Utøyas muittašeamen jápman ustibiid.
Oktiibuot 77 olbmo masse heakkaset terrordaguin Utøyas ja Oslo ráđđehuskvartálas. Gávccis sis ledje eret Finnmárkkus dahje Tromssas.
NRK Sápmi deaivá Stine dakka maŋŋel muitodilálašvuođa. Jahki áigi vulggii ovttas 11 eará Kárášjoga nuorain AUF geasseleirii. Oktiibuot ledje leairras 700 nuora.
- Odne in leat smiehttan nu ollu váivves tiŋggaid. Lean jurddašan eambboge daid skihpáriid geaid lean massán. Lean vázzán sullos ja muittašan sin. Sii leat mu jurdagiin juohke beaivvi. Lean čirron veháš, muhto lea maiddái mojohallan go lean go lean beassan leat ovttas nu fiinna olbmuiguin, muitala Stine.
Stáhtaministtar ja AUF jođiheaddji čieruheigga
Sihke stáhtaministtar Jens Stoltenberg ja AUF jođiheaddji Eskil Pedersen oassálasttiiga muitodilálašvuhtii sullos. Stáhtaministtar doalai sártni máŋga čuođi nurrii, máŋga stáhtaráđđái ja bargiidbellodat-veteránii.
- Ráhkis AUF lahtut, ráhkis álbmot. Lea nu buorre leat das dáppe, muhto seamma áigge lea nu bávččas, álggahii Stoltenberg sártnistis Utøya muitobottus.
Ollugat čirro go AUF njunuš hálai.
- Ráhkis AUF lahtut: Lean nu váivvis go dát galggai dáhpahuvvat. Oktage mis ii leat ráhkaduvvon dustet dakkár bahávuođa. Mii váldit dehálaš lávkkiid ovddasguvlui iežamet eallimiin. Veahkehit nubbi nuppi viidáseappot. Lean áddetmeahttun čeavlái din dihte. Dáhton din giitit roahkkatvuođas ja árvvolašvuođas, dajai Eskil Pedersen.
- Son válddii muhtumiid min čábbáseamos rásiin, muhto son ii sáhte bissehit giđa, loahpahii Pedersen.
Erenoamáš deaivvadeapmi
Stine Marie Høgdenis lei maiddái vejolašvuohta áibbas erenoamáš deaivvadeapmái. Son beasai deaivat albmá gii su gájui dan ilgadis beaivvi diibmá.
- Lea buorre deaivat su ođđasit. Dihten son lei dáppe, muhto in diehtán ahte beasašin su deaivat njunnálaga. Lean agibeaivái giitevaš dan ovddas maid dagai.
Bjørn Juvet dat gájui Stine Utøyas. Ovttas eará eaktodáhtolaččaiguin gájui son nuoraid geat ledje vuolgán vuojadit sullos nannamii.
- Dat lea erenoamáš beaivi, muhto dihten ahte dat beaivi vel boađášii. Leamaš buorre beassat deaivat fas AUF nuoraid. Dat dat lea buorre bealli otnážis, dadjá Juvet.
Stine muitá mo veallái suolu nuppi bealde, čázeoaivvis bávttiid lahkosis, go fuomašii Bjørna fatnasa.
- Go oidnen su ledjen nu galbmon. Smihtten ahte ferten vuodjat fatnasa lusa. Mun dušše fertejin dan dahkat, muitala Stine.
Vaikko leamašge lossat, dáhttu Stine beassat ovddasguvlui eallimisttis.
- Muittán arvvi. Lei ránis ja ahkit. Muittán daid ilgadiid mat dáhpahuvve, muhto ii leat dat maid háliidan jurddašit. Ii leat dat maid Utøya lea munnje. Háliidan baicca muitit daid buriid muittuid mat mus leat Utøyas.