- Mun lean gearggus ovttasbargagoahtit NSR:in ja bivddán dál sin váldit oktavuođa Sámedikki unnitbellodagaiguin, logai Isak Mathis O. Hætta sárdnestuolus.
Nu šattai ge smiehtadan-ja ráđđádallanboddu Sámedikkis dál beaivit.
Jáhku mielde ii šatta dalle Bargiidbellodaga stivrejumi árvalus okto jienasteapmái go Sámediggi fas čoahkkana maŋŋá dán bottu otne
SÁB garrasit BB vuostá
Sámeálbmotbellodaga Terje Tretnes ja Čielga sámi jiena, Jánoš Trosten manaiga garrasit vuostá bargiidbellodaga stivrenáigumuša. Soai doarjjuiga goappašagat NSR:a otne iđitbeaivvi sáhkavuoruin.
GB maiddái cuiggodii BB:a
Olaf Elisassen mielas lei maid ártet ahte Bargiidbellodat ii leat čájehan stuorát beroštumi daidda smávvabellodagaide Sámedikkis. Son lea ain vejolaš ovttasbargi NSR:a koališuvdnii.
NSR:a bealde leat maiddái
Johttisápmelaččaid listta Per A Bæhr ja Dáloniid Listta Isak Mahtis O. Hætta leaba maid gergosat doarjut NSR:a. Per A. Bæhr gal lea juo ovdalis dorjon sin, muhto otná iđitčoahkkimis de han fálai Isak M. O Hætta maiddái iežas ovttasbargoguoibmin NSR:ii.
