Ikte jienastedje joatkkaskuvlaoahppit miehtá Norgga skuvlaválggaide. 18 skuvllas besse oahppit jienastit maiddái sámediggeválggaide.
Dát leat gelddolaš geahččalanválggat, mat dávjá čájehit guđe guvlui jienasteaddjit juohkásit maid albma válggain.
- Dás gávnnat
12 áirasa
Jus dát livčče albma válggat de faskešii Norgga Sámiid Riikasearvi ovttas oktasaš listtuin Sámi Álbmot Bellodagain olles 12 áirasa dahje saji Sámedikkis.
NSR oažžu 28,3 proseantta jienain. Dát lea stuorra ovdáneapmi mannan válggaid ektui.
Maid Guovddašbellodat ovdáná ja lea dáid válggaid nubbin stuorámus bellodat. Bellodat oažžu 12,5 proseantta jienain.
Bargiidbellodat ja Árja goalmmádin stuorámus
Bargiidbellodat ja Olgeš masset eanemus jienaid. Bargiidbellodat mii leamáš nubbin stuorámus bellodat Sámedikkis gahččá goalmmát sadjái go oažžu 11,4 proseantta jieanain.
Árja oažžu maid skuvlaoahppiin seammá olu doarjaga, namalassii 11,4 proseantta.
Sámediggepresideantta Vibeke Larsena bellodat, Šiella, oažžu dán jienasteamis 8,8 proseantta jienain ja lea viđádin stuorámus.
440 oahppi 18 skuvllas oasálaste dán jagi jienastemiin sámediggeskuvlaválggáide.
Norsk senter for forskningsdata (NSD) dat lea mii čohkke skuvlaválggaid bohtosiid.