NSRa vuosttaš nissonolmmoš jođiheaddji ja Sámedikki ovddeš várrepresideanta, Ragnhild Lydia Nystad, oažžu otne Norgga Sámiid Riikkasearvvi gudnebálkkašumi jahkečoahkkimis Guovdageainnus.
Ragnhild Lydia Nystad lea riegádan Kárášjogas 04.11.1946.
GULA:
Guovddáš olmmoš sámepolitihkas
Nystad oahpu váldán čuohpadanbuohccedivššárin (anestesisykepleier) ja jođihii Sámi buohccedivššárlihtu jagiin 1985-1991. Son lea maid moanaid sámiidsearvvis leamaš jođiheaddjin ja lei vuosttaš nissonolmmoš gii jođihii NSRa.
Bálkkašumivuoiti lea leamaš guovddáš olmmoš goziheamen sámi perspektiivva ođđa mánáidgárdelágas. Son son lei guovddážis hábmemin Sámedikki dearvvasvuohtapolitihka. Son lea maid guhká bargan vuoigatvuohtagažaldagaiguin, čállá NSR preassadieđáhusastis.
– Mii sáhttit dadjat, ahte bálkkašumivuoiti lea nannosit váikkuhan dasa ahte dál leat Sámedikkis 51 proseantta nissonolbmot, lohká NSR-jođiheaddji Silje Muotka.
Norgga Sámiid Riikkasearvi lea dán vahkkoloahpa čoagganan riikkačoahkkimii Guovdageidnui. Doppe leat oktiibuot čuođi áirasa ja bovdejuvvon guossi. Bálkkašumivuoiti finadastá jahkčoahkkimis ja lea dasto jođus veahkehit Áfrihká eamiálbmogiid.