Golmmas njealji nuorra sápmelaččas vásihit vaši. Nu boahtá ovdan ođđa Mihá-dutkamušas.
Dan oktavuođas árvalage Norgga Sámiid Riikkasearvvi (NSR) áirras, Runar Myrnes Balto, álggahit neahttakursa sámevaši birra.
– Mii oaidnit mo sámevašši dávjá dáhpáhuvvá árgabeaidilis, nugo bargosajiin, skuvllain ja astoáiggedoaimmain, dadjá Myrnes Balto.
Márjá Viktoria Langmo Petersen (19) mielas lea diehtojuohkin dehálaš, ja jáhkká dehálačča čuvget mii sámevašši lea.
– Jáhkán maiddái skuvladoibmii lea dehálaš oaidnit sámevaši váikkuhusaid, dadjá Langmo Petersen.
TIL ii dohkket sámevaši
#dohkketmu lea dán doaimma namma, ja lea njuolga joatkkan #doarváidál kampánnjii.
Romssa valáštallansearvi (TIL) searvvai #doarváidál-kampánnjii.
– Mii eat dohkket ahte mánát ja nuorat eai beasa nannet ja seailluhit iežaset identitehta ja ovdánahttit iežaset.
Nu dadjá TIL ovddeš spábbačiekči ja dálá servodatovddasvástideaddji Tom Høgli. Su mielas lea vahát oaidnit sámevaši Romssas.
– Dat lea stuorra váttisvuohtan, maid mii eat dohkket, dadjá son.
Loga ášši:
Máhttu bisseha ovdagáttuid
Máhttu bisseha ovdagáttuid, oaivvilda vealahanáittardeaddji.
– Máhttu ja duohtadieđut leat dehálaččat miellaguoddobarggus, jus galggaš nákcet bissehit ovdagáttuid iešguđet joavkkuid vuostá, čállá fágadirektevra, Mariette Lobo e-poasttas NRK:i.
Dása lea Langmo Petersen ovtta oaivilis. Su áhčči, Hans Petersen váiddii sámevaši ja vuittii ášši dikkis.
Langmo Petersen čuovui ášši dárkilit, ja jáhkká kurssa sáhttit unnidit dakkár áššiid.
– Go oahpahat olbmuide mii sámevašši lea, de jáhkán olmmoš smiehtasta guktii ovdalgo dadjala maidege fasttiid, go diehtá ahte sáhttá loavkašuhttit nuppi, dadjá son.