– NRK ja NRK Sámi bealis lean hui movttet go Måsø ja Hivand oažžut NRK Sámi redaktevrrajovkui. Ovttas sudnuin lean sihkkar ahte mii nákcet loktet sámi áššiid oidnosii ja bohciidahttit servodatdigaštallamiid, lohká NRK Sámi hoavda, Mona Solbakk.
Ođas- ja áigeguovdilhoavda
Ođas- ja áigeguovdilvuođaredaktevrran galgá Måsø (39) jođihit doaimmahaga gos leat badjel 40 bargi.
Måsø lea ollu jagiid bargan riikka median, nugo NRK Nyheter, TV2 ja VG. Son lea ovdal ge bargan NRK Sámis. Maŋemuš áigge leat Måsø bargan Forbrukerinspektørene-prográmmas NRK:s.
– Mun lean hui movttet go Måsø dál máhccá fas Sápmái. Su nanu journalistamáhtuin nanusmahttit NRK Sámi áigumuša loktet beroštumi sámi áššiide sihke Sámis ja Norgga našunála dásis ge.
Måsø lea Deanus eret. Maŋemuš logi jagi lea son orron Oslos. Jan Rune Måsø álgá redaktevrravirgái čakčamánu 1. beaivve.
– Šaddá hui gelddolaš jođihit dan stuorámus ja fámoleamos davviriikkalaš sámi ođasdoaimmahaga. Ođas- ja áigeguovdildoaimmahusa erenoamášvuohta lea ahte dáppe bargat sihke báikkálaš ja riikkaidgaskasaš áššiin, lohká Jan Rune Måsø. Lea dehálaš čalmmustit sámi servodatdili stuorra servodahkii ge. Måsø mielas šaddá hui hástaleaddji ja gelddolaš jođihit doaimmahusa dán duohtavuođas.
Almmuhanredaktevrra
Girkonjárgalaš Pål Hivand (49) álgá almmuhanredaktevrran. Su ovddasvástádus lea erenoamážit ovdánahttin NRK Sámi almmuheami sihke otná ja ođđa medialávddiide.
– Hivand:in fitnet mii erenoamáš analyhtalaš ja strategalaš redaktevrra geas lea buorre digitála áddejupmi ja čehppodat. Son áŋgiruššá loktet ja rahpat sámi servodatdigaštallama. Justa dan maid dárbbašat dál, lohká Solbakk.
Hivand bargá dál Sámedikki gulahallanráđđeaddin, gos maiddái leamaš gulahallanhoavda. Son lea journalistan bargán máŋgga medias, nugo Finnmark Dagblad, Sør-Varanger avis ja NRK Sámis.
– Mun illudan searvat jovkui gos galgat ovdánahttit sámi ja norgga almmolaš ságastallama sámi servodaga birra. Gávdnoš go gelbboleabbo ja eanet relevánta biras justa dása go NRK Sámis, lohká Pål Hivand. Su mielas lea dehálaš ahte NRK Sápmi nákcešii speadjalastit ođđaáigásaš sámi eallima, go diehtit ahte eanet dat eanet sápmelaččat ellet árbevirolaš eallima rávddas.
Hivand álgá almmuhanredaktevrra virgái skábmamánu 1. beaivve.
