Hopp til innhold

– Luohti seaguhuvvon musihkkii geasuha!

Nu lohká dovddus skearrofitnodaga buvttadeaddji, Håkon Mathias Guttormsen.

Les på norsk.

Håkon Mathias Guttormsen er modell for det samiske klesmerket Gobmi/Ghost.

HÅWK: Håkon Mathias Guttormsena artistanamma lea HÅWK.

Foto: Håkon Borg

Skealbma mojiin rávkala son buori beaivvi go su govva ihtá munno videoságastallamis.

Håkon Mathias Guttormsen (24) lea máŋggabealat olmmái. Son bargá sihke musihkkabuvttadeaddjin, čuojaheaddjin ja modeallan.

Produsent Håkon Mathias Guttormsen i studio.

ILLUDA: Viimmat beassa Håkon Mathias Guttormsen fas ráhkkanit konsertii.

Foto: Anders Boine Verstad / NRK

Sus leat ollu prošeavttat ja huššás árgabeaivi, mainna loaktá bures.

Justte dál lea son váldán smávva bottoža muinna ságastallat. Son Álttás, mun ges Kárášjogas.

Son orru Oslos, muhto dál lea dušše finadeame iežas ruovttubáikkis Álttás. Doppe lea hárjehallame konsertii iežas joavkkuin Northkidain.

– Min lea bággu hárjehallat jus galgat leat gergosat konsertii, bohkosa Håkon.

Nugo buot eará artisttatge, de eai leat sii beassan čuojahit guhkes áigái.

«Háliidan eanet sámi musihka»

Vuosttažettiin lea dát sámi bárdni musihkkabuvttadeaddji skearrofitnodagas Nonstop Music Norwayas, ja orru lihkostuvvame bures. Diibmá buvttadii lagabui moaddelot šuoŋa.

Máŋggat dáin ožžo maiddái erenoamáš fuomášumi. «Elå» šuokŋa maid buvttadii Ex On The Beach beakkálmasain John Sámmol Kemiin, šattai «dán jagáš lávllan Sámis».

Dán gilvvu lágidii Sveriges Radio ja SVT Sápmi.

Håkona čalmmit báite gilvvu su silba čeabetvirjjiiguin go hupmá sámi musihka birra.

– Mun gal duođai liikon dasa, ja háliidan eanet sámi musihka buvttadit, lohká son.

«Headhunted»

Dábálaččat olmmoš ferte ieš ohcat barggu fitnodahkii, dan ii dárbbašan Håkon.

– Mun vuhtten ahte Håkon lea erenoamáš barggán, hutkái ja sus lea maid hui čaffadis musihkkastiila. Danne fállen sutnje barggu, muitala Nonstop Musica beaivválaš jođiheaddji Hef Augusto.

Musikkprodusent Håkon Mathias Guttormsen sitter i studio.

BARGGÁN: Håkona hoavda muitala ahte Håkon lea dat vuosttaš olmmoš barggus ja maiddái dat maŋemus, gii vuolgá ruoktot.

Foto: Anders Boine Verstad / NRK

Čigŋás bárdni

Dat vuhtto maiddai bures ahte dát 24-jahkásaš áltálaš ii leat soaittáhagas čiŋadan.

Sus leat áibbas českes vuovttat ja čáhppes báidi. Sus leat vielgadin vuidojuvvon gaccat ja čeabet birra heaŋgájit golbma stuora silbačeabetvirjji. Gieđas šealgájit silbasuorpmas ja giehtabáttit.

– Mus lea hui stuora beroštupmi čiŋadeapmái, ja liikon virjjiide bures, muitala son.

Danne heive bures ahte son maiddái lea modeallan sámi bivttasmearkka Gobmi/Ghost ovddas.

Håkon er modell for Gobmi/Ghost

MODEALLA: Håkon lea aittobeale leamašan modeallan sámi bivttasmearkka Gobmi/Ghost ovddas.

Foto: Håkon Borg

– In gulahala áhkuin

Ii leat dušše musihkka ja stiila mas Håkon berošta.

Håkon lea sámi govvadáiddára, Trygve Lund Guttormsen -rohki, áddjut. Lund Guttormsen bajásšattai Njoammelgohpis, Álttás, muhto sajáiduvai Mázii, gos náitalii Håkona áhkuin, Elliin.

Musikkprodusent Håkon Mathias Guttormsen forteller at han ikke kan samisk.

GÁHTÁ: Håkon gáhtá go ii háliidan oahppat sámegiela skuvllas.

– Vaikko mánnán ledjen dávjá áhku ja ádjá luhtte Mázes, de in dađibahábut oahppan fávdnádit sámegiela, muitala 24-jahkásaš.

Odne son gáhtá go ii oahpahallan eanet.

Dađi mielde go áhkku vuorasnuvai, de heittii son maid dárusteames. Dál dárbbašeaba Håkon ja áhkku dulkka jus galgaba gulahallat.

Dása háliida Håkon gávdnat čovdosa.

– Lean jurddašan ražastit oahppat sámegiela. Gávdnogo son makkárge áppa mainna oahpašii jođánit, jearrala son.

Produsent Håkon Mathias Guttormsen i studio.

BEAKKÁLMASAT: Håkon lea buvttadan musihka máŋgga realitybeakkálmassii. Omd. Adrian Sellevollii.

Foto: Anders Boine Verstad / NRK

Musihkkamáilbmái mátki

8-jahkásažžan álggii son čuojahit rumbbuid iežas lanjas. Moadde jagi maŋŋel čohkohalai ges ja báddii go čuojahii gitára.

Álttá nuoraidviesus «Huset» gávnnadii Helge Reinsnes Moeniin. Soai álggaheigga musihkkajoavkku.

Nu duolmmuiga bálgá mii doalvvui sudno goappašagaid Northkid-jovkui, mas otne ain čuojaheaba.

Pressefoto

NORTHKID: Bilal Saab (lávlu), Håkon Mathias Guttormsen (lávlu/gitára), Helge Reinsnes Moen (lávlu/keys), Sebastian Willassen (rumbbut), Vegard Olaussen (bássa).

Foto: NorthKid / Pressefoto

20-jahkásažžan ipmirdii Håkon ahte son ferte fárret Osloi jus galggaš olahit stuora musihkkabirrasa maid váillahii.

– Mun loavttán bures hušaid siste. Danne heivii nu bures fárret oaivegávpogii, muitala son áŋgirit.

Oslos son láigohii studio seamma visttis go Nonstop Music, ja nu de fuomášuvvui su erenoamáš musihkkataleanta.

Niegut sáhttet ollašuvvat

Oallugat ráhkadit lávlagiid ruovttus. Iežaset lanjain čohkkájit ja niegadit lávllaalmmuhemiid birra. Máŋgii sin niehku nohká dasa.

Håkon diehtá ahte sáhttá leat váttis sáddet iežas lávlaga earáide.

– Sáhttá leat hui unohas álggos, muhto ii ovttasbargu šatta jus it sádde, nevvoda son.

Buvttadeaddji buohtastahttá dan bargoohcamušain. Ii oaččo barggu jus ii váldde oktavuođa bargoaddiin.

Produsent Håkon Mathias Guttormsen i studio med to hunder

OHCALA: Buvttadeaddji Håkon Mathias Guttormsen ohcala sámi musihkáriid. Su askkis čohkohallaba Toby ja Diesel.

Foto: Anders Boine Verstad / NRK

Vaikko Håkon máŋgii lea realitybeakkálmasaid gaskkas de son ii lihkká čevllohala. Son baicca vuollegašvuođain lohpida vástidit buohkaide, geain ležžet musihkkagažaldagat sutnje. – Sáddes munnje dieđu. Mun vástidan buot dieđuide, dadjala son loahpas, ovdal giddeje munno videoságastallama.

Korte nyheter

  • Ođđa sámediggeválggaid ferte lágidit maŋimustá geassit

    Sámedikki ságadoalli Pirita Näkkäläjärvi ii sáhte vel dadjat, maid ođđa válggaid lágideapmi johtilis áigetávvaliin mearkkaša, dieđiha Yle Sápmi.

    Alimus hálddahusriekti (AHR) dagai historjjálaš mearrádusa, go mearridii vuosttaš geardde, ahte Suoma sámediggeválggaid galgá lágidit ođđasit.

    Ođđa válggaid galggašii sámediggelága mielde lágidit guovtte olles mánu geažes das, go válggaid gomiheames lea mearriduvvon.

    AHR presideanta Kari Kuusiniemi dulkojumi mielde ođđa válggaid galgá lágidit geassemánu loahpa rádjai.

    Pirita Näkkäläjärvi
    Foto: Ođđasat / Yle Sápmi
  • Eai beasa gieldda gohčodit Pajalan kunta

    Ruoŧa ráđđehus hilgu Pajala gieldda ohcamuša geavahit meänkieli nama «Pajalan kunta» gieldda bálddalas namman, čállá Fria Tider áviisa.

    Ráđđehus mieđiha, ahte lea vuogas čalmmustahttit veahádagaid ja nannet veahádatgielaid.

    Almmatge deattuha ráđđehus, ahte ii ovttage gielddas Ruoŧas leat eambbogo okta almmolaš namma. Sii livčče spiehkastan dás jus livčče dohkkehan ohcamuša.

    Fertešii lágaid rievdadit jus galggašii sáhttit gielddaide dohkkehit eambbogo ovtta nama.

    Meänkieli
    Foto: Svenske Tornedalingers Riksforbund – Tornionlaaksolaiset
  • Gielddaluohti bohciidahttá digáštallama

    Gáivuona gielddastivra evttoha dohkkehit sierra luođi gielddaluohtin. Dát ii oro buohkaid mielas nu buorre jurdda, go sin oaivila mielde ii leat Gáivuonas iežas juoiganárbevierru.

    – Mun in leat luođi vuostá. Luohti lea juoga mii gulai ja ain gullá boazodoalliide ja sámiide geain dát lea oassi iežaset kultuvrras, čilge gáivuotnalaš Levin Mikkelsen.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    – Min gielddas lei dáruiduhttin dievaslaš. Dákkár oaivilat gullet dan áigái. Su suokkardallan čájeha, ahte Gáivuonas juigojuvvui. Nu ahte ii leat duohta ahte Gáivuonas ii leat juigojuvvon, lohká Leiros.

    Herman Rundberg ja su joavku Manne dat leat ráhkadan dán luođi.

    – Luođi mihttomearri ii lean suhttadit olbmuid, muhto digáštallan lea bures boahtin, árvala Rundberg.

    Gáivuona gielddastivra ávžžuha sidjiide ovddidit máhcahemiid gielddaluođi birra. Áigemearri lea dán mánu maŋimuš beaivve.