Norgga beale bohccot guhtton Ruoššas
Orohaga 5a ja 5c Mátta-Várjjat gielddas leat 40 bohcco guokte mánu guhtton Ruoššabeale rája Báhčaveaji Álbmotmeahcci bealde. Dál ovddida Ruošša buhtadusgáibádusa go Norgga bohccot leat Ruoššas guhton, ja buhtadusgáibádus sáhttá šaddat 47 millijovnna kruvnnu, čállá iFinnmark áviisa.
Diibmá juovlamánu 9.beaivve vuhtte Báhčaveaji Álbmotmeahcci bargit Ruoššabeale rája 12 bohcco Rajakoski-Nihkkel mohtorjohtolaga guoras, mii lea justa Báhčaveaji rája badjel Mátta-Várjjagis. Lohku lassánii loahpas, ja lohke 40 bohcco boahtán Finnmárkkus Ruššii.
Pasvik National Nature Reserve direktevra, Natalia Polikarpova muitala ahte bohccuin ii leat lohpi guohttut dien sajis gos oidne Norgga bohccuid guohtumin, ja dan geažil leat sii meroštallan ja bidjan buhtadusgáibádusa.
– Mii leat sádden gáibádusa ja leat vuordimin vástádusa Norgga bealde, nu lohká direktevra Polikarpova.
Son muitala vel ahte lea guktui beliid duohken digaštallat mo loahpalaš buhtadus šaddá, sii eai leat vel gullan maide Eanandoallodirektoráhtas.
Eanandoallodirektoráhtas dieđihit ahte luomu geažil eai leat vel šaddan meannudit ášši, muhto lea čielggas ahte fertejit čoahkkinastit vai besset čielggadit buhtadusgáibádusa.
Beahcevai orohaga ovdaolmmoš Egil Kalliainen muitala ahte juovlamánus 2022 rasttildedje 9 bohcco rájá badjel
– Eará bohccot leat ovdalaččas leamašan juo doppe. Muhtin ráje bohccot leat 2019 juo rasttildan rájá, muhto pandemiija ja geopolitihka dihte eai leat bohccot beassan Norgga beallai fas, muitala Egil Kalliainen
