Duopmárat ohppet sápmelaččaid birra: – Sámi perspektiiva sáhttá orrut ártet

Sámi jurddašanvuohki ja kultuvra sáhttá leat amas duopmáriidda ja dat buktá hástalusaid diggeáššiin.

Norgga alimusriekti lágidii dán vahkku seminára, man ulbmil lei oahpahit sámerivttiid birra.

Trond Biti lea bealuštan sápmelaččaid sihke diggegottis, lágamánnerievttis ja alimusrievttis.

Lágamánnirievttis leat hárve sámi duopmárat, ja Alimusrievttis ges dušše dáččaduopmárat. Dat buktá hástalusaid, oaivvilda Biti.

– Dat lea eará ja amas máilbmi duopmáriidda. Dat lea máŋgii hástalus ekspropriašunáššiin, dat eai dovdda boazodoalu ja dan jurddašeami.

– Dat lea álo hástalus go geahččá eará kultuvrra amas čalmmiiguin, dadjá advokáhtta Trond Biti.

Norgga alimusriekti lea daid maŋemuš vihtta jagi gieđahallan 15 sámi guoskevaš áššiid. Earret eará Sárevuomi čearru, Ottar Anti, Jovsset Ante, Fosen ášši ja Nils Morten Skum leat lágastan alimusrievttis.

Sámi perspektiiva sáhttá orrut ártet

Biti oaivvilda ahte dakkár seminára lea ávkkálaš, muhto ii jáhke oaidnit ávkki ovttatmano.

– Soaitá váttis oaidnit ná konkrehta jođánit, muhto guhkit áigge badjel sáhttá leat buorre riektesihkkarvuohta perspektiivii. Dat sáhttá mielddisbuktit ahte duopmárat jurddašit eambbo go bohtet eaŋkiláššit. Sáhttá leat guhkitáigge perspektiivvas ávkin.

Sis- ja Nuorta Finnmárkku diggegoddi lea erenoamáš dainna go doppe leat sámi duopmárat, geat dovdet sámi kultuvrra. Dat lea Biti mielas mávssolaš.

Makkár sámeáššiin lea váttis olahit ipmárdusa Norgga riektevuogádagas?

– Mus leat leamaš moadde ášši gos lea leamaš veahá sáhka ja vihkkedallan sámi árbevieruid dan dihto Norgga paragráfa ektui, ja dat lea álo hástalus.

– Dáččat árvvoštallet Norgga paragráfaid, dat heive sin jurddašallama mielde ja sámi perspektiiva máŋgii orru veahá ártet sidjiide, dadjá Biti.

Dáruiduhttin báidnan riektejurddašeami

Semináras digaštalle sámi guoskevaš áššiid Norgga duopmostuoluin.

– Ulbmil lea bidjat sámi dimenšuvnna rievttálaš gažaldagaid fuomášupmái, Vuođđoláhka §108 geatnegahttá stáda eiseválddiid láhččit vuođu nu ahte sámi álbmot beassá sihkkarastit ja ovddidit iežas giela, kultuvrra ja servodateallima.

– Dát addá gáibádusaid Norgga duopmostuoluide, earet eará duopmáriid gelbbolašvuhtii, ipmárdussii ja áddejupmái, dajai Alimusriektejustitiárius Toril Marie Øie rahpansártnistis.

Øie muitalii maid ahte sámerievtti ovdáneapmi ii leat álo leamaš álki ja čujuhii dáruiduhttinpolitihkkii, mii báinnii riektejurddašeami.

Oahpai sápmelaččaid birra

Ovddeš Sámi vuoigatvuođalávdegotti jođiheaddji Carsten Smith lohka son lei maid álggos amas sámevuhtii.

– Jus lei juoga maid dovden ahte jođánit ohppen, vaikko in oahppan visot, dat lei ahte sápmelaččat lea sierra albmot mas iežas kultuvra, muitalii Smith semináras.

Smith ii leat áidna gii lea alcces háhkan oahpu sámiid birra, nu lea maid juristta Kirsti Bull Strøm dahkan.

Trond Biti oaidná erohusa barggus dan rájes go álggii advokáhttan bargat.

– Dat lea olu mii lea dáhpáhuvvan dan rájes go mun álgen advokáhttan. Dat lea hui buorre dieđusge.