Nordlys šálloša Joika-čállosa

Ollugat cuiggodedje Nordlysa váldočállosa, sihke lohkkiid reivviid bokte ja sosiála mediain.

Dan dagai maiddái Norgga kulturráđi lahttu Maria Utsi gii lea čállán kronihka dán birra (olggos NRKs), ja sámi artista Ella Marie Hætta Isaksen.

Ikte Nordlys politihkalaš redaktevra Skjalg Fjellheim šállošii sátnegeavaheami čállosis (olggos NRKs).

– Muhtimat riŋgejedje muitalit ahte sii čirro go lohke min váldočállosa. Dat dieđusge čuohcá, dadjá Fjellheim.

Álgočállosis čuožžu earret eará:

«Diekkár loavkašuhttin-hysteriija lea várra eambbo vahágin sámiid beaggimii go Joika-gáhkut goassege bohtet leat.»

Diet oassi lea dál sihkkojuvvon.

• Loga maid: Joika álggahii ovttasbarggu Tise:in – Ožžot olu moaitagiid

– Bahča go Davvi- Norgga stuorimus áviisa nie čállá

Maria Utsi moaráskii go logai váldočállosa.

– Mun suhtten hirbmosit. Mu mielas lei dat čállon badjelgeahččanvuođain ja cuoigun láhkai.

Erenoamáš bahča lei go čálus lei deaddiluvvon Davvi-Norgga stuorimus áviisii, ja ahte lei vel áviissa iežas váldočálus.

– Mun in sáhttán dien váldočállosa diktit leat vástitkeahttá. Iežan čállosis geahččalin čilget ahte mu vásáhus ja duohtavuohta lei áibbas eará go sin, dadjá son.

–Mii leat meaddán

Garra moaitagat dagahedje ahte áviisa válljii rievdadit váldočállosa.

– Mii oaidnit ahte muhtin sánit ja dajaldagat sáhttet loavkašuhttit ja bávččagahttit olu sápmelaččaid, dadjá Fjellheim.

Makkár sánit eai livčče galgan adnot?

– Áviissas ii leat makkárge vuoigatvuohta čuoččuhit ahte sámit galget dohkkehit ja gierdat stereotyhpalaš vuogi mielde govviduvvot. Mii leat meaddán, ja mun šállošan sakka, dadjá Fjellheim.

– Lávki rievttes guvlui

Son mieđiha ahte eai leat dahkan doarvái buori barggu.

– Mii eat lean doarvái dihtomielalaččat das mot majoritehta álbmoga geahčastat sáhttá leat áibbas earálágan go olu sápmelaččaid, geat leat vásihan vealaheami ja cielaheami sápmelašvuođaset dihte, dadjá Fjellheim.

Utsi atná árvvus áviissa šállošeami.

– Juste dat, ahte sii mieđihit ahte majoritehtaálbmot ii álo ipmir mot minoritehta álbmot vásiha duohtavuođa, lea dehálaš dovddastus ja dehálaš lávki rievttes guvlui, lohká son.