Nohkkon ruđas
– Vuotnaguolástuslávdegoddi lea nohkkon ruđas ja čoahkkimat lágiduvvojit danin dál eanaš dušše telefovnna bokte, šálloša stivrrajođiheaddji Trond Einar Karlsen.
Ruhtaváttisvuohta lea čuožžilan dan geažil go lávdegoddi dál ferte ieš máksit buot čállingotti goluid. Ovdal lea Guolástusdirektoráhta máksán dáid goluid.
Lávdegotti mandáhta lea nannet vuotnabivddu hálddašeami, ja galgá deattuhit earenoamážit sámi geavaheami ja dan mearkkašumi mearrasámi báikegottiide. – Ruđahisvuohta čuohcá dán bargui, lohká stivrrajođiheaddji ja lea bivdán Sámedikki ja fylkkagielddaid čuovvolit ášši.