NRK Sápmi oažžu sudno ságaide sotnabeaivve iđida. Jovnna Ánde Balto Henriksen (19) ja Anders Boine Verstad (18) leaba bures oađđán mannan ija, dát lea dehálaš ovdal gilvvuid. Jovnna Ánde Balto Henriksen lohká iežas áigut vuoiŋŋastaladit dassážii gilvvut álget golmma áigge.
– Dat lea borrat bures ja juhkat olu čázi. Diibmobeale ovdal gilvvuid ferte liekkadišgoahtit.
Maiddái Anders Boine Verstad lohká dehálažžan vuoiŋŋastit.
– In bora nu olu dál iđđes, 2-3 diimmu ovdal gilvvu boradan bures, ja de vel njaŋgát sofas dassážii go lea áigi liekkadallat rupmaša.
14 miilla duolbmut
Otná gilvvut masa searvaba lea 136 km. Jovnna Ánde Balto Henriksen lohká vuosttaš jorbema dehálažžan.
– Leat garra luohkat ja nu, go vuosttaš jorbema nagodan čuovvut de lean guhkás beassan. De ii leat go jorbema ain hávális jurddašit.
Son lohká dehálažžan sihkkelastit ovddemusaid searvvis, vai ii ribat heaitit go earát dan dahket.
– Ollugat bohtet gahččat eret dán mađe garra gilvvuin.
Anders Boine Verstad lea leamašan olu buozas maŋemuš mánuid. Danin šaddet dát gilvvut dego geahččaleapmin dasa mot orro birgeme.
– Eai leat nu stuora vuordámušat, sávvamis ollen mollii.
Siskkáldas mokta
Finnmárkkus lea muohta geainnuin badjel beali jagis. Goappašagat lohkaba fertet leat buori movtta jus galgá lihkostuvvat. Anders Boine Verstad lohká alddis dakkár ráhkkanusa viesus masa sihkkela bidjá gitta, ja nu sáhttá birra jagi sihkkelastit, muđui ii šatta buorren.
– Lean dálvet leamašan Mallorcas ja Slovenias, vai beasan hárjehallat olgun sihkkeliin. Dát lea oba mávssolaš, de oaidná maid ahte lea duođai ávki hárjehallamis.
– Dán faláštallamis maid adno siskkáldas mokta jus áigu lihkostuvvat. Danin vuolggán dál ruoktot ráhkkanit gilvvuide mat galget Oulus. Doppe lea mus buoret vejolašvuohta vuoitit, ja dárbbašan dákkár vuoittu jus galggan nagodit movttiidit iežan viidáseappot, dadjá Jovnna Ánde Balto Henriksen.
Norggameašttirgilvvut leat miehtá boahtte vahku. Eambbo dieđuid gilvvuin gávnna dáppe: