NRK Meny
Normal

Njuvve unnit go diibmá

Finnmárkku boazoeaiggádat leat dán njuovvanáigodagas njuovvan sullii 8.000 bohcco unnitgo diibmá.

reinslakting 19

Finnmark Rein AS njuvve 41.000 dán njuovvanáigodaga, mii lea arvat unnit go diimma áigodaga.

Foto: Marte Lindi

Finnmark Rein AS lea dán njuovvanáigodaga njuovvan 41.000 bohcco njukčamánu loahpa rádjai, ja dat lea unnit go diibmá.

Diimmá njuovvanlohku lei sullii 50.000.

Heajos haddi ja garra Norgga ruvdnoárvu dagahii ovttagaskka dan, ahte muhtin boazoeaiggádat vuvde Suoma beallái.

Suoma bealde buoret haddi

Ovttagaskka vuvde olbmot bohccuideaset Suoma beallái, go doppe lei buoret kilohaddi.

Johan Mathis Buljo

Heajut ealáhat ja miessejahkki lei stuorimus sivvá manne boazoeaiggádat eai njuovvan nu olu go ovddit njuovvanáigodaga, jáhkka Finnmark Rein AS njuovvankoordináhtor, Johan Mathis Buljo.

Foto: Privat

Lei Suoma beale Polarica-njuovahat Suoma bealde mii osttii bohccuid Norgga bealde.

– Mii osttiimet masá 3.000 bohcco, muitala Kim Innala Polarica-njuovahagas. Innala navdá, ahte gievrras Norgga ruvdnu dat dagahii ahte boazoeaiggádat ožžo ovttagaskka buoret hatti Suoma bealde.

Finnmark Rein AS njuovvankoordináhtor Johan Mathis Buljo mieđiha ahte ribahedje Supmii kundariid, muhto dat ii leat stuorámus sivvan dasa go eai njuovvan seamma olu go diibmá. Buljo doaivu stuorimus sivvan lea go mannan jagi lei heajut ealát ja heajut miessejahki. Dát dovdui erenoamážit Nuorta-Finnmárkkus, dadjá Buljo.

Finnmark Rein AS njuovvankoordináhtor Johan Máhtte Buljo muitala ahte dán jagi ledje erenoamaš buorit bohccot.

– Čakča lei nugo earáge čavččat, muhto dálvebohccot ledje erenoamáš buorit dán jagi, dadjá Buljo.