Njuolggodubben vuosttaš geardde Norggas

– Filbma lei hui gelddolaš. Mun liikojin buot daidda gumppiide dieppe. Dat lei hui kula maid. Mun gal lean stuorra fána dies, lohká Per Viljar Gaup Aslaksen (11).

Son ja su oabbá Maya Isabell (8) leigga geahččamin filmma «Gumpehámis - Wolfwalkers» Tromsø Internasjonale Filmfestival Junior (TIFF Junior) -filbmariemuin Romssas.

– Orui leamen gelddolaš ja somá. Hirbmat gelddolaš go áhčči šattai gumpen, lohká Maya Isabell.

Guktuid mielas lea hirbmat vuogas go filbma dubbejuvvo sudno eatnigillii.

– Mu mielas lea kula ja gelddolaš go hállet sámegiela. Mun gal liikon dán filbmii nu garrasit, dovddaha Per Viljar.

Giehtasárgojuvvon animašuvdnadáidda

«Wolfwalkers» lea čáppa filbma ustitvuođas, duostilvuođas ja balus das mii lea amas.

Filbmadahkki Tomm Moore dat duhkoraddá dáinna muitalanvugiin iežas giehtasárgojuvvon máidnasis, mii lea albma visuála illu čalbmái.

Filmmas oahpásmuvvat nuorra bivdooahppái Robyn ja su áhččái. Soai mannaba Irlándii veahkehit jávkadit maŋimuš gumppevalvvi. Visot almmatge rievdá, go friijalunddot nieiddaš rievdá gumpen ihkku.

Sara Margrethe Oskal lea jorgalan visot mii daddjo filmmas sámegillii. Ovttas nieiddainis soai dubbiiga buot rollaid filmma čájehettiin.

– Moai letne hárjehallan olu ja jorgalan visot replihkaid. Dalle ii leatgo neavttašit visot maid nagoda go filbma čájehuvvo, čilge Oskal.

Fargga mátkái

Njuolggodubben lea oalle hástalus. Buot mii daddjo ferte daddjot rivttes áigái ja rivttes intonašuvnnain.

– Visot manná hui jođánit. Dát lea vel action-filbma, mas geavvá olu ja mas leat ollu karakterat. Munnos lea leamaš stuorra bargu juogadit daid rollaid. Moai letne sakka hárjehallan rievdadit jiena jođánit, čilge Oskal.

Njuolggodubben ii leat goassige ovdal dahkkon Norggas. Iige leat dahkkon sámegilliige ovdal.

– Dát lea hui somá, go lea vuosttaš geardi go mun lean mielde njuolggodubbemis. Stuorámus hástalus lea rievdadallat jiena go leat nu máŋga iešguđet karakterat, čilge Emma Elliane Oskal Valkeapää.

Dat, geat eai sáhttán filmma geahččat Romssas, eai dárbbaš heađástuvvat. Fargga oainnat Sara Margrethe ja Emma Elliane dolleba mátkái filmmain.

– Golggotmánus dollet dáinna filmmain Finnmárkui. Gáju Mánáid (Redd Barna) ja TIFF Junior dat lágidit čájáhusmátkki. Dat šaddá hui somá, navdá Oskal.

– Mun maid illudan dasa, lohká Oskal Valkeapää.