Hávnii siskeleapmosii Porsáŋgguvutnii bohte lávvardaga sihke golbmaduhát espánjalačča.
Seammá sajis sii dollejedje fas viidáset fanasmátkái.
Máŋgačuođis bohte gáddái, ja sus geas lei ovddasvástádus fuolahit turisttaid lei duhtavaš.
– Mu mielas lea buorre oaidnit mo lea organiserejuvvon, ja ahte guovllu olbmot besset čájehit mo kultuvra lea dáppe. Lea erenoamáš fiinnis, go Finnmárku lea nu erenoamás, lohká turistaovddasvástideaddji Arne Henrik Sagmo.
Gallededje Kárášjoga
Ii lean lieggaseamos beaivi mii dássái lea leamaš Leavnnjas, muhto espánjalaččat eai liikká gollon.
– Ii leat galmmas. Ledjen jáhkkán ahte galggai leat galbmaset. Mis lea olu lihkku mátkis, muitala turista.
Eatnašat geat bohte «MS Empress» lustamátkeskiippain áigu johtit Levdnjii bussiin, muhto muhtimat maid áigu finadit dobbelis.
Turisttat ledje boahtán davás oaidnit čuvges ijaid, nu mo 78 jahkásaš báskárlaš nisu Usoa gii maid illudii sápmelaččaid oaidnit.
– Mun lean lohkan sápmelaččaid birra ovdalgo bohten deikke, ja oainnán ahte sámegielain lea dáhpáhuvvan nu mo báskárgielain; mii eat leat beassan hállat dan ja fertiimet guhká doarrut ovdalgo beasaimet geavahit iežaset giela ja joatkit hállat dan, čilge son.
– Ávkin siseatnamii maid
Oktiibuot manne 400 skiipaturistta badjel duoddara galledit Kárášjoga, ja doppe váldojedje vuostá Sápmi Parkas.
Báikkálaš hotealladirektevra lohká, ahte ovttasbargu rittu, vuona ja siseatnama sáhttá šaddan stuorra ávkin olles guvlui.
(Ášši joatkašuvvá gova vuolábealde)
– Midjiide lea stuorra árvu beassat čájehit sápmelaččaid kultuvrra ja eallinvuogi, ja dehálaš fievrridit turisttaid sisaeatnamii maid, lohká direktevra John Arne Mathiesen.
Usoa beasai vásihit veháš das maid lei hálidan, ja son bovdesta sápmelaččaid Báskáreatnamii.