Hellin Pietikäinen bargá oahpaheaddjin muhto astoáiggis son goarru earret eará lávkkaid ja daidda son geavaha njáhkáčuoma. Su mielas lea buoret ávkkástallat guollebázahusaiguin dan sadjái go bálkut daid. Hellin lea fuomášan mo nuortalaččat barget ja danin šattai sus maid miella geahčalit guollečuoma geavahit duddjomis. Nuortalaččat leat ná guhkká bargan ja dál leat maid earát Suomas iskamin dán vejolašvuođa, muitala Hellin Pietikäinen.
Njáhkáčuopma lea dat buoremus
Hellin lohká leat iskan geavahit iešguđet guollečuomaid muhto eará guliid ektui lea njáhkáčuopma dat buot buoremus, lohká son. Njáhkáčuomain lea álkit bargat ja dat gierdá maid eanet go luossa-, hávga- dahje dorskičuopma. Njáhkáčuomas leat maid erenoamáš dielkkut mat čábbát vel hervejit lávkka, lohká Hellin. Dan buoremus čuoma gávdná guoli oaivegeažis danin go dat leat assámus ja buot nannoseamos čuopma guolis. Beavrrasjávrris Náhkkelis Eanodagas sii fidnejit njágáid muhto dál gal doppe ii leat ollu fidnemis, lohká Hellin Pietikäinen.
Árdni sullos sii fuomášedje
Hellin muitala sin ollu jođašan Árdni sullos Skiervvá suohkanis Norgga bealde. Doppe sii vásihedje guolásteddjiid geat bálku guollečuomaid ja dat bovttii de dan jurdaga ahte geavahišgoahtit čuomaid masa nu ávkin dan sadjái go daid bálkut, muitala son. Dál sii leat iskamin mo mearraguollečuoma vel sáhttá masa nu geavahit, lohká Hellin Pietikäinen gii ássá Eanodagas Suoma bealde sámis.