Porsáŋggu searvegotteráđis ii leat ruhta oastit ođđa sálbmagirjjiid. Ruhta mii ráđis lea, fertejit geavahit doaibmagoluide. Jos Ipmilbálvalusaid oktavuođas galggašedje čoaggit ruđaid de manašii 3 - 4 jagi, ja soaitá vel guhkit áigi mannat ovdalgo sáhtašedje ođđa sálbmagirjjiid oastit ja váldit atnui. Sálbmagirjjit mákset sullii 80 000 ruvnnu.
Sálbmagirjjit gálggašedje váldot atnui dán jagi
Porsáŋggu gieldda girkoverdde Egil Borch lohká ođđa sálbmagirjjit galggašedje dán jagi váldot atnui. Dál lea eaŋkil olmmos álggahan ruhtačoaggima jos de mat čoggošii ruhta dan mađi ahte Poršáŋggu girkoráđđi nagadivččii oastit ođđa sálbmagirjjiid. Ruhtačoaggindoaibma illudahttá Borcha.
Eaŋkil olmmoš álggahii ruhtačoaggima
Margrethe Bakkevold, gii ieš lávlu Porsáŋggu girkokoaras, fuomašii ahte jos son álggahivččii ruhtačoaggima, na de soaittášii searvegotteráđđi sáhttit oastit daid ođđa sálbmagirjjiid main leat sálmmat golmma gillii, sámi-, kveana- ja dárogillii. Dál lea ruhtačoaggin doaimmas, de son navdá iežaset nagadit veahkehit Porsáŋggu searvegotteráđi čohkket ruđaid ođđa sálbmagirjjiide.