– Futsal lea dat spábbačiekčan vuohki mii geasuha nuoraide eanemusat, nu ahte mun jáhkán eanet joavkkut servet dál cupii.
Nu lohká Guovdageainno faláštallanjoavkku senior-spábbačikčiid kapteaidna Jørn Inge Eira.
Son čiekčá maid Guovdageainno futsal-spábbačiekčanjoavkkus, mii lea searvan futsal- ráidočiekčamiidda sihke ovddit jagi ja diibmá.
– Ii leat nu stuora erohus
Eira čilge ahte Nilut Cupa njuolggadusain ja futsal njuolggadusain ii leat nu stuora erohus, muhto leat moadde erohusa. Spábba lea okta dain.
– Spábba lea earálágan futsalas. Dat lea dego dat spábba mii adno 11-spáppačiekčamis olgun geasseáigge, muhto sturrodat spáppas ii oro go njelješ. Seammás oažžun dovddu ahte spábba lea veaháš guoros ja nu johtá njozebut.
Nubbi lea movt moallasuodjaleaddji lea mielde spealus.
– Moallasuodjaleaddjái ii oaččo čievččastit spáppa eará okte, go joavkku falleha. Jus olgočiekči goitge addá spáppa moallasuodjaleaddjái, de šaddá friddjačievččasteapmi nuppi jovkui. Jus seammá vuorus dubmejuvvo jovkui eanet go vihtta friddjačievččasteami, de dubmejuvvo ráŋggáštus čievččasteapmi čieža mehteris guđat háve ja das maŋás.
Eanet joavkkuid cupii
Kapteaidna jáhka cupii servet eanet joavkkut Nordlánddas ja Tromssa filkkas, go dát čiekčan-vuohki lea bivnnut dain guovlluin.
Vaikko báikkálaš joavkkut eai leat hárjánan dása, de jáhka Jørn Inge Eira ahte báikki joavkkut maid lassánit.
– Mii ja máŋggas earát leat vuordan futsala-vuogi Nilut Cupii ja mun jáhkán ahte ođđa čiekčan vuohki sáhttá geasuhit vel eambbo báikkálaš joavkkuid searvat, lohká son.
Seammá jáhkka Nilut Cupa jođiheaddji Lise Karita Hætta.
– Mun jáhkán lágas guovllu čikčiid sáhkkin futsal-vuohkái, ja danin servet cupii, lohká son.
Njiedjan beroštupmi
Hætta muitala ahte Nilut Cupii lea njiedjan beroštupmi.
Diibmá serve dušše 16 dievdojoavkku ja gávcci nissonolbmojoavkku.
– Diibmá fertiimet hástalit eanet nissonolbmojoavkkuid cupii. Mii guhkideimmet dieđihanáigemeari vai oaččuimet doarvái joavkkuid mielde, lohká son.
Niluhiid njunuš sávvá ahte ođđa čiekčanvuohki boktá fas beroštumi.
– Sávvát ahte čiekčit geat eai leat ovdal searvan futsal-čiekčamiidda, bohtet geahččalit dán čiekčanmálleha.
Nilut Cupa šaddá ovttalágan «kick off»-lágideapmi dahje álgolágideapmi ovdalaš go futsal-ráidočiekčan álgá Finnmárkkus.
Joavkkut sáhttet dieđihit iežaset cupii maŋŋel 1.b golggotmánus gitta 23 beaivái. Cupa álgá 13.b skábmamánus.