Turistasiidda eaiggát , Risten Lango muitala ná movt son gii lei lávu luhtte, vásihii dáhpáhusa:
Sii ledje golmmas oktiibuot. Okta bázii biilii luoddagurrii ja guovttes vázzileigga lávuid lusa. Dievdu gii lei turistenbáikkis duddjome ja snihkkeme, fuobmái jođánit ahte ledje rievvárat jođus.
Sii rievidedje sus telefuvnna ja ruđa, muhto sámi dievdu beasai báhtui. Go viehkalii , gulai báhčaleami ja ahte čurvo "Stopp, din jævla same!"
Čiehkádalai jándora meahcis
Risten Lango ii diehtán maidege das mii lei geavvan sin turistenbáikkis, ovdal go nuppi iđida. Go bođii lávuid lusa, vuhtii ahte báiki lei guođđeluvvon hui fáhkka. Dalle árvidii ahte juoga lei boastut. Ja go son gii lei leamaš bargame doppe, ii gávdnon ságaide, de dieđihii politiijade su láhppon.
Muhto son ii lean láhppon. Son lei suorganan ja čiehkádan meahccái.
Easkka jándora maŋŋel duosttai dievdu fas njiedjat vulos váris.
Ballá rasisttalaš áigumušain
Dál lea rievváriid báhčaleapmi ja uhkideapmi surgehan Risten Lango maiddái.
Son ii leat sihkar lei go dat dábálas rievideapmi, muhto ballá ahte rievváriin ledje rasistalaš áigumušat.