Ollosolmmožin son easka álggii glássabossun ohppui, vaikke álo lea geasuhuvvon justa fal dien báhkka glássabossumii. Sutnje lea dát bargu leamaš nu erenoamaš, son duođai hálidii dán oahppat.
Niegut ollašuvve
De dál de lea ollašuvvan Tonje Tunold`guhkesáigge jurdda. Iežas muitala leat jurdagiiguin hápmen báhkka glásas vaikke makkáraš čáppa biergasiid viehka ollu jagiid ovdal go vulgiid glássabossunohppui. Oahppu válddii son Dánmárkkus ja Ruoŧas.
Bajásšaddan olgoriikkas
Tonje Tunold lea riegádan Gjøviikkas Mátta Norggas, muhto šaddanbáikki guđii son juo guđamánnosažžan. Su vánhemat fárriiga olgoriikii bargui, danne lea Tonje bajásšaddan Kenyas Afrihkkás ja maiddái Australias.
Guhkimusat orron Sámis
Tonje Tunold lea guhkimus áiggi iežas eallimis orron Sámis, danne dovdá gullevaš Sápmái. Son lea Nrk Sámi Radio bargan olu jagiid, sihke govvideaddjin ja ossodat hoavdan. Son lea náitalan ja lea guovttemáná eadni.