Tonje Tunold lea ilus ja duhtavaš go duosttai ollašuhttit niegus. Son lohká ahte muhtumin lea measta jáhkkemeahttun ahte son dál eallá nieguin.
– Láse lea erenoamáš ávnnas. Proseassa lea maid magihkkalaš go lea hui oanehis gaska álgojurdagis gárvves buktagii. Ja dát lea mu!
Golbma jagi gaccai lásehápmenoahpu Kostas, Ruotas. 2009:ii skábman son viimmat beasai lávket vuosttaš lávkki eallima ođđa bálgás, go de son rabai láseduodjebáji, Boble glasshytte Kárášjogas.
Tonje Tunold lea duhtavaš go beassá bargat lásehápmemiin, muhto lohká dán leat lossa bargun.
Foto: Brita Åse Norlemann / NRKLossa bargu
Muhto lásehápmenbargu lea lossa bargu, ja son lohká ahte ferte lea sihke gievra ja sávri dán barggus.
– Čuožžut, čohkkat, čuožžut čohkkat beaivvi. Ja doallat lossa lásebossunrevrriid čađat.
Go son lásiin álgá, de dat álo vuolgá golgi lásiin man darvviha guhkes revregeahčai. Dan ruovderevrre son joraha seammás go bossu, fas liekkada, joraha, bossu ja hápme.
– Ja dat lea báhkas dás čuožžut. Mun bivastalan ollu ja buolán measta juohke beaivve. Muhto mun liikon geavahit rupmaša ja bargat dákkár bargguid. Mun dovddan ahte ealán!
“Gunvor” – dehálaš biigá
Su deháleamos biigá lea Gunvor.
– Gunvor lea nugo nissonolbmot muđui: Jorbbas, báhkas, divrras ja son suhtada veahá. Dan ferte bures dikšut, Tonje ieš leaikkastallá. Gunvor lea oainnat su ommán, ja dát ommán lea álo nalde. Beroškeahttá alla elrávdnje- ja gássaboaldámušhattiin.
'Gunvor'; láseommán mas leat badjel 1100 lieggagráda.
Foto: Brita Åse Norlemann / NRKGunvoris leat 1140 lieggagárda, muhto ihku njeaidá temperatuvrra 1080 grádii. Dan siste lea 50 lihttera báhkka, golgi láse ja dás juohke lásedáidda vuolgá.
Gunvora ii gánnát jáddadit go ádjána golbma beaivve čoaskut ja 3-4 beaivve fas dan liekkadit.
Go láse lea gárvvisin hápmejuvvon, de dat lea 'galmmas', namalassii sullii 500 lieggagráda.
Foto: Brita Åse Norlemann / NRK
500 lieggagráda lea galmmas
Go lásiin bargá, de dat lea dego báhka honnet. Dan ferte máhttit stivret, ja Tonje ferte álo diehtit dego ovddalgihtii maid dainna galgá dahkat boahtte ceahkis. Bargadettiin čoasku láse jođánit. Go lea sullii 600-700 gráda, de lea láse nu galmmas ahte ferte Gunvor dan fas liekkadit. Go lásebuvtta lea gárvvisin hápmejuvvon, de dat lea 500 gráda liekkas. De ferte dan hiljit čoaskudit nuppelot diimmu erenoamáš ommánis.
– Jos menddo jođánit čoasku, de láse luoddana ja cuovkkana. Juohke áidna ceahkki láse válbmemis lea gelddolaš. Láse lea rašši ja sáhttá juohke oasis proseassas mollanit. Dat fascinere!
