NRK Meny
Normal

Neavttár illuda Ásia-mátkái

Neavttár illuda neaktit "Giddagasas" čájálmasa Ásias. Doppe beroštit u ollugat Beaivváš Sámi Teáhtera čájálmasas ahte leat ferten liige čájálmasaid vel fállat.

Anitta Suikkari
Foto: Thoralf Balto

Beaivváš Sámi Nášunalateáhter dolle duorastaga Nepalii ja Bangladeshii čájálmasain "Giddagasas". Dacha gávpogis Bangladesh:s leat goappaš čájálmasa bileahtat vuvdon, nu ahte leat ferten bidjat liige čájálmasaid dokko. Bihttás neakta Anitta Suikkari buot rollaid okto lávddis, ja son illuda mátkái dollet

Beaivváš Sámi Teáhtera bihttás Giddagasas

Anitta Suikkari neaktimin

Foto: Beaivváš Sámi Teáhter:Johan Mathis Gaup

Maŋŋebargga nevtii Anitta Suikkari "Giddagasas" bihta Oslos, Det norske Teateris. Ja dát lei maid maŋimuš geardde go dat čájehuvvui Norggas ja Sámis.

Suikkari ii loga gal nu ollugiid leamasan geahččamin dán čájálmasa Sámis, muhto Oslos gal ledje sullii 80:s geahččamin bihtá.

Dál go neakta Dacha gávpogis de dáidá dilli leat áibba eara, go doppe dáidá son sihke gullat ja hakssit olu olbmuid. De dalle gal ferte áibbas eara láhkai ražastit dáinna čájálmasain.

Čájálmasa čálli eret Dacha gávpogis

Bihtta resiševra Kanraludding Nilu lea Dacha gávpogis eret, muhto ássá dál Oslos. Nilu galledage dál Beaivvas Sámi Násunála teáhteriin iežas ruovttu gávpoga.

Nilu lea olu bargan teáhteriin doppe, ja dáida dat leat leamaš stuorra veahkkin dasa ahte olbmot doppe beroštit "Giddagasas" bihttas, lohka Suikkari.

Teáhterhovda navdá leat dasa eará siva

Beaivváža teáhterhoavda Haukur J. Gunnarsson

Beaivváža teáhterhoavda Haukur J. Gunnarsson

Foto: Dan Robert Larsen / NRK

Beaivváš Sámi Teáhtera hoavda Haukur J. Gunnarsson navdá leat maiddái eará siváid dasa go doppe beroštit "Giddagasas" bihttás. Ii dáidde leat dušše dien bihtá dihtii, danne go Dacha:s leat sii ovdal leamaš čájálmasain, ja dalle maid bohte olu gehččit. Gunnarsson illuda čájehit sámi kultuvrras eará guovlluide.

Mas lea sáhka čájálmasas

Greikalaš Lia Karavia dat lea sáhka dás. Som vásihii máŋgga geardde geavvat giddagassii iežas politihkkalaš oainnuid geažil. Ja dat lei danne go sus ledje oainnut mat vuosttildedje dalá militeardiktatuvrra oainnuid. Dát attii ja addá duogáža "Giddagasas" čájálmassii.

Giddagasas bihttás

Giddagasas bihttás

Foto: Beaivváš Sámi Teáhter: Johan Mathis Gaup

Anitta Suikkari lohka iezas oahppan olu bihttas, justa fal das ahte mo veahkehit ja birget váttes dilis.

Suikkari neaktá Nina

Anitta Suikkari
Foto: Thoralf Balto

Bihttás oaidnit Nina, gean Anitta Suikkari neaktá. Son lea giddagasas, olbmuid dásseárvvu miellačájeheami dihte. Navdimis lea son árben vánhemiiddis eallindili, go soaige oaguhuvvuiga ja geavaiga giddagassii iežaska opposišuvdna daguid dihtii.

Nina jurddaša iežas vásáhusaid giddagasas, sihke mánnán eatni mielde, ja dál rávisolmmožin. Mo son vásihii váigatvuođa, bággehalai psykalaččat ja givssiduvvui sihke fysalaččat ja seksuálalaččat.

Neaktá logi beaivvi ásialaččaide


Dáinna čájálmasain galgá Beaivváš Sámi Teáhter johtit Ásias logi beaivvi. Mátki lea olgoriikadepartementta ruhtadan. Ja go juo Ásias beroštit sin teáhteris, de lea son jurddašišgoahtán ásahit ovttasbarggu doppe guovllu teáhteriiguin, dan lohká Beaivváš Sámi Teahtera hoavda, Haukur J. Gunnarsson.

Álggos galledit sii Nepala gos sii leat nášunála teáhterfestivála guossin, ja ovddastit Norgga dáid riemuin.