NATO militearahárjehallan sáhttá hárdit Ruošša

Fargga galget 5000 Nato soalddáha hárjehallamii Davvi-Norgii, ja stuorra oassi hárjehallamis lea Finnmárkkus.

NRK Moskova doaimmaheaddji Morten Jentoft jáhkká NATO hárjehallama hárdit Ruošša eiseválddiid. Muhto Mátta-Várjjat sátnejođiheaddji Cecilie Hansen ii bala dáin lassi militearadoaimmain, muhto vuohttá movt EU ja Norgga sankšuvnnat Ruošša vuostá lea čuohcan rádjagávppašeapmái.

Ruošša rádjeguovllus

Mátta-Várjjat Nuorta-Finnmárkkus lea Ruošša rádjeguovllus, ja sátnejođiheaddji oaidná movt ruhtaárvu Ruošša rubelis lea gahččan, go EU sankšuvnnat Ruošša vuostá álge. Dat dahká ahte ruoššat eai suitte seamma ollu go ovdal gávppašit Mátta-Várjjagis.

– Dál leat vátnon rádjerasttildeaddjit ja gávppašeaddjit Girkonjárggas, dat dieđusge čuohcá báikkálaš fitnodagaide, dadjá sátnejođiheaddji Cecilie Hansen.

Sátnejođiheaddji lea maid gullan ahte militearadoaimmat leat lassánan Davvi-Ruoššas, muhto Hansen jáhkká gieldda ássiid hárjánan dasa, ja eai bala go militeara doaimmat lassánit guovllus.

– Son jáhkká gal ahte olbmot jurddašit veahá eambbo militearadoaimmaid birra dál, muhto sii gal dihtet man guovllus sii orrot ja dihtet maid gievrras ja stuora ránnjá birra nuorttabealde, lohká Hansen.

Hárdet Ruošša eiseválddit

NRK Moskova doaimmaheaddji, Morten Jentoft, son gal jáhkká NATO hárjehallan Finnmárkkus, provoseret dahje hárdit Ruošša eiseválddiid. Jentoft maid čilge ahte Finnmárkkus leat dušše Norgga soalddáhat hárjehallan ovdal, go dat lea leamaš šiehtadus Norgga ja Ruošša gaskka, muhto dál lea Norga bovden NATO hárjehallat guvlui.

– Das sáhttet boahtit garra reakšuvnnat Ruoššas ja dat lea nu ahte Ruošša maid soaitá ráhkkanit stuora hárjehallamiid doallat rádjeguovlluin, lohká Jentoft.

Jentoft čilge maid manne Ruošša lasiha militearadoaimmaid davvin.

– Dal lea nu ahte mii leat gullan ahte Rošša lea fas čájehan beroštumi árktalaš guovlluide, muhto sii leat muitalan munnje ahte sis leat álot leamaš militearadoaimmat davvi guovlluin ja ahte sii leat dál fas boahtime ruovttoluotta, lohká Jentoft.

Lulde ballet Ruoššas

Mátta-Várjjat sátnejođiheaddji jáhkká Ruošša balu lullelis Norggas.

– Sii gal leat hárjánan Ruašša doaimmaide rájiid nalde, muhto son jáhkká lullelis stuorát balu go stuora Ruošša militearaveahka álgá lihkadit Norgga rájiid lahka, lohka Hansen.

Cecilie Hansenis leat maid sátnejođiheaddjin ollu politihkalaš oktavuođat Ruššii, nu go ránnjágielddaide.

– Ruošša beale sávvet ahte ovttasbargu joatkašuvvá nu movt ovdal, ja ahte sii doalahit dálá buori gulahallama, lohka Hansen.