Dát bođi ovdán go Ruonáeatnama ráđđehusa jođiheaddji Kuupik Kleist ikte deaivvadii Norgga olgoriikaministariin Jonas Gahr Støren ja Stáhtaministar Jens Stoltenbergain.
Digáštallat čovdosiid
Dálkkádatrievdamat čuhcet eanemusat eamiálbmogiidda, muhto sin oainnuid mielde eai viša máilbme njunnožat gullat ge go čoahkkanit digáštallat dálkkádatrievdama váikkuhusaid, lohká Kleist.
Go máilmme njunnožat čoahkkanit digáštallat čovdosiid dálkkádatrievdamiidda, de vásihit eamiálbmogat ahte jearatkeahtta valdojit sin eatnamat dálkkadatrievdan eastadandoaimmaide, nugo bioboaldámušaid buvttadeapmai čilge Kleist.
Sihkkarastit eamialbmogiid jiena
Son lea ikte soahpan norgga ráđđehusa njunnošiiguin bargat dan maid sii sáhttet sihkkarastindihte ahte eamiálbmogiid jietna gullo buorebut dálkkadatdigáštallamin. Norgga ráđđehus lea bovden Kleist guossái, guhte ovddit jagi válljejuvvui Kalaallit Nunaata ráđđehusa jođiheaddjin.