NRK Meny
Normal

Heaitá ollásit sámepolitikas

Suoma Sámedikki ságadoalli Klemetti Näkkäläjärvi heaitá ollásit sámepolitikas ja lávke Sámedikkis dutkanmáilbmái.

Klemetti Näkkäläjärvi

Klemetti Näkkäläjärvi

Foto: Ođđasat / Yle

Dan dieđiha Yle Sápmi .

– Háliidin muitalit áššis áiggebále ja maiddái loahpahit spekulašuvnnaid das, ahte vikkalin čuovvovaš válggain fas ságadoallin, čilge Näkkäläjärvi mearrádusas.

Son lea dán birra čállán iežas bloggas .

Näkkäläjärvi mieđiha ahte dát ii lean álkes mearrádus. Son áigu dál goit vuodjut ođđa hástalusaide.

– Sámi politihkka ja sápmelaččaid vuoigatvuođaid ovddideapmi leat munnje duođaid dehálaš áššit ja luohpan lea persovnnalaččat nai váttis. Muhto mus lea áigi ohcat ođđa hástalusaid ja máhccat dutki gieddái ja oassálastit dan guovllos servodatlaš ságastallamii, muitala Näkkäläjärvi.

Suomas leat sámediggeválggat čakčat. Näkkäläjärvi lea doaibman sámedikki ságadoallin guokte válgaáigodaga.