Aili Kathrine Wergeland Teigmo - «Duostil»
Aili lea máŋga jagi bargan musihkain ja lei earret eará diibmá mielde SGP:s «Bajimusas» lávlagiin. Dan maŋŋel háliidii eambo lávlut sámegillii.
Dál geahččala Kárášjohkalaš nuppes «Duostil» nammasaš šuoŋain.
Ná šaddá dán jagáš Sámi Grand Prix
Ja dás oainnát dán jagi oasálastiid!
Máret Áile Gaup Beaska - «Ráhkis hoavda»
18-jahkásaš deatnulaš lea SGP:a nuoramus oasálasti dán jagi. Son lea bajásšaddan musihkalaš bearrašis gos luohti ja musihka lea lunddolaš oassi eallimis.
«Ráhkis hoavda» lea sámi árvvuid ja iežamet dearvvašvuođa birra. Doaivva lea ahte lávlla addá fámu guldaleddjiide ollašuhttit nieguid.
Linus Johnsen - «Cevzoset Hilat»
Musihkka lea Linusa eallin ja nu lea leamaš dan rájes go álggii musihkain 13 jahkásažžan. Dál lea Dielddanuorilaš 19 jagi ja studere musihka Romssas.
«Cevzoset hilat» govahallá eallima mohkiid. Vaikko orru seavdnjat, de lea vejolaš gávdnat hila ja beassat váttes dili čađa.
Mihka ja Andreas - «Ále guođe mu»
20-jahkásaš deatnulaš, Mihka, lea áhččeolmmoš ja oahpaheaddji. Lávlla «Ále guođe mu» lea ráhkisvuođa ja moarssis birra.
Lávlaga ja šuoŋa lea Mihka čállán ovttas Andreasin, gii bargá beaivválaččat musihkkárin. Andreas searvá nuppes SGP:ii. Diibmá bođii nubbin SoÁ joavkkuin, šuoŋain «Áiggi mielde».
Yungmiqu ja Jezebro - «Cokka gávtti!»
Ohcejohkalaččat Mihkku (20) ja Jesse (19) leaba guhkká bargan ovttas ja almmuhan musihka. Soai leaba earet eará searvan «Suoma Taleanttat» prográmmii ja soai beasaiga gitta semifinálii.
Dál leaba gergosat Sámi Grand Prix lávdái. «Cokka gávtti!» šuoŋain háliideaba čalmmustahttit sámi kultuvrra ja giela.
Elin Oskal - «Lusa»
Sálátlaš Elin Oskal lea boazodoalli ja sus lea gullevašvuohta Gárasavvonii. Son lea maid lávlu ja neavttár. Earret eará lei son sámi BlimE!-artista 2021:s «Bávkkanas» lávlagiin.
Lávlla «Lusa» bođii sutnje pandemiija áiggis go son ohcalii oktavuođa earáiguin, ja erenomážit irgeávdnasiin.
Nils Peder A. Gaup - «Johan Nils Peder»
Iŋgor Ántte Nils Pedar lea boazodoalli Guovdageainnus ja luohti lea oassi su beaivválaš eallimis.
Son lea njeljii ovdal searvan Sámi Grand Prix:i, 2004:s, 2014:s, 2019:s ja 2021:s.
Anders Isak Oskal - «Sara Máijja Oskal»
Ánte Issát lea boazodoalli Guovdageainnus ja lea njelljii searvan Sámi Grand Prix:i ovdal, 2011:s. 2012:s, 2015:s ja 2017:s. Dál soaittát dovdat su «Søringen og samen» ráiddus TV 2:s.
Son juoigá iežas risnieidda Sárá Máijjá Oskal.
Nils Johan A. Gaup - «Lise Merete»
Guovdageaidnulaš Nils Johan lea bajásšaddan boazodilis ja lea oktii ovdal searvan Sámi Grand Prix:i, 2021:s.
Dán háve son juoigá Lise Merete, su boarráseamos neabi moarssi. Nils Johanii lea bearašoktavuohta hui dehálaš, ja son lea bidjan luođi buot iežas lagamuččaide.
Saara Hermanson -«Goeksege»
Saara boahtá Stornäsas, Klimhpie guovllus Västerbottenis, ja bargá oahpaheaddjin Johkamohkis dál.
Son lea guktii ovdal searvan, ja lea oktii vuoitán lávlunoasis, «Mov laavlome» 2019:s. Dán jagi ges juoigá guovssat-lotti, dahje «Goeksege».
Astrid Tuorda - «Unnavielja»
Astrid lea 19 jagi boaris ja orru Gironis, muhto lea bajásšaddan Randijauras olggobeale Johkamohki. Don soaittát dovdat su SGP-Cover prošeavttas mas son lávllui sullii 1000 geahččái Guovdageainnus diibmá.
Astrid gohčoda iežas astoáigeaktivistan ja vuostálastá earret eará ruvkedoaimmaid. Sus lea maid stuorra beroštupmi ođđasisgeavahit biktasiid.
Heli Aikio - «Piegâkandâ»
Anárlaš Heli Aikio lea giellabargi ja artista. Son hállá sihke davvisámegiela ja anárašgiela.
Dál searvá son goalmmát háve Sámi Grand Prixii. Vuosttaš háve, 2014:s, vuittii lávlunoasi. Nuppi háve go searvvai lei son mielde juoiganoasis.
Dál lea fas mielde juoiganoasis, «Piegâkandâ» (Bieggagánda), livđiin. «Piegâkandâ» bođii sutnje go háleštii skihpáriin geas lea beroštupmi lundui ja birasgáhttemii.
Dán jagi láidesteaba Agnete Saba guovttos Ole Máhtte Sara Nedrejordain gehččiid Sámi Grand Prix doaluin.
– Munnje lea stuorra gudni beassat lágidit Sámi Grand Prix.
– Lea hirbmat somá oažžut vejolašvuođa leat prográmmajođiheaddji Sámi Grand Prix:s.
Sámi Grand Prix 2023 čájehuvvo NRK1:s ja NRK TV:s beassášlávvardaga, cuoŋománu 8. beaivvi diibmu 19:50.
Ansvarlig redaktør
Vibeke Fürst Haugen