– Iv gåjt Guovddagæjnnuj maná dåssju lávlotjit. Mån sidáv vuojttet. Jus pálla nali besav de la buorre. Vuostasj vaj nuppát sadjáj. Jali brånsåv, niegat Kalle.
Divtasvuonak Karl Edvard Urheim, jali Kalle Urheim gåk gåhtjoduvvá, lávvodagá Sámi Grand Prixan oassálasstá lávllagijn mij iesj suv lusi bådij.
– La suohtas oadtjot lávllagav lávllot majt aktak ælla ájn gullam, dan namma l Idjasuojvvanis. Gå galga oaddát ja seŋgan veludalá ja ájádalá, de dá ájádusá sjaddi dagu suojvvanis mij manná sielo ja vájmo tjadá.
– Manen dáv lávllagav dahki?
– Iv gåjt dal mån diede. Lávllak iesj muv lusi dálven bådij aktan tevstajn.
Ja jus vuojttá de ájggu viehkat Gasskaijá maratonav tjáppa skuovaj ja gitárrajn.
Ietjas gávnaj
Jagen 2003 Kalle Osloj jådij gånnå ietjas musihka baktu gávnaj.
– Musihkkaiellem la niehko majt duosstiv duosstot moadda jage dás åvddåla. Jåhtiv Osloj gånnå galggiv ietjam gávnnat persåvnålattjat. Ja de árvvediv lávllot ja musihkka la muv iellem. Duosstiv dajna barggagoahtet ja lávllot.
Dálátjij la sån nágin CD-skierroalmodimijda sebradam, ja dijmma ietjas skierrov almodij.
– Dijmma tjavtja de EPav almodiv niellja lávllagij. Duodden lav lávllum Vuonav ja Svierigav birra, duola dagu girkkon ja hejan.
Ådå skierro
Ja dálla la sujna juo dal ådå musihkkaprosjækta.
– Dijmmá Sámedikkes ruhtadoarjjagav oadtjuv almodit sálmma ja vuojŋŋalasj CDav, gånnå li dábálasj sálma, muhtem lávllaga majt lav iesj tjállám ja nágin ma li svierigagielas ja ruossjagielas jårggåluvvam.
– Mijá lávllomvuogen la tevstaj ja melodijaj árvvo majt hæhttup várajda válldet.
– Goassa bessap dav skierrov gullat?
– Iv dal ájn riekta diede, valla doajvov sjaddá gæssáj jali tjaktjaj. Vuojnná dav. Mån lav esski dájna prosjevtajt álggám ja galggap studioj bassátjij maŋŋel, vásstet Kalle.
