NRK Meny
Normal

Vihkeles åarjelsaemien pensjovnistijde gaavnedidh

Daan mietsken asken, edtjieh dah åarjelsaemien pensjovnisth Rørosesne, Plassjesne gaavnesjidh.

Røros

Rørosen staare.

Foto: Linda Bjørgan / NRK

Saemien Åålmege edtja daam pensjovniste tjåanghkoem øørnedh. Daan jaepien edtjieh 20 åarjelsaemien pensjovnisth abpe Nøørjeste, Plassjesne gaavnesjidh. Dagkeres tjåanghkoe vihkeles, Saemien Åålmegen diakonebarkije, Bertil Jønssone jeahta.

Bertil Jønsson

Diakone barkije Bertil Jønsson.

Foto: Ristin Persson / NRK

– Vuejnebe dam, eah gieh jeatjah dagkeres tjåanghkoem buektedh øørnedh. Tjoeveribie åånetji viehkiedidh, Jønssone jeahta.

Akten aejkien jaepesne dagkeres tjåanghkoe gusnie dah åarjelsaemien pensjovnisth gaavnesjieh. Ij leah aelhkie beetnegh dagkeres tjåanghkose åadtjodh, Jønssone bievnede.

– Dah båeries almetjh tjuerieh jijtje gaajhkem maeksedh. Ibie mijjieh naan beetnegh daan tjåanghkose åådtjeme jallh maakseme. Gærhkoe dihte, barre dah skylleme tjåanghkoeh åvteste maaksa, Jønssone bievnede.

Læjhkan jijnjesh sijhtieh båetedh.

Ektesne murriedidh

Mietsken 19.b. edtjieh Rørosesne gaavnedidh jih 20.b. edtjieh, Vikese, Glåmosen baalte, gusnie edtjieh gaske-bijjiem byøpmedidh jih vaajesh goltelidh.

– Ibie mijjieh utnieh dagkeres fuehpies provgrammem. Dah båeries almetjh sijhtieh sinsitnene soptsestidh jih noereh baeleste mojhtestehtedh, jih kanne gieh naan båeries gieries-voeten bijre soptsestieh, Jønssone mojjeste.

Nov sån, dah pensjovnisth buektiehtieh lustestalledh jih murriedidh.