– Go sirdit diimmu ovddos, de oatnu idja ovttain diimmuin. Mii sáhttit dál lihkus illudit čuovgadeabbo eahkediiguin, dadjá ealáhusministtar Iselin Nybø preassadieđáhusas.
Su sáhttá gohčodit Norgga áigeministtarin, go su departemeanttas dat lea ovddasvástádus Justervesenii, mii lea dat ásahus mas lea ovddasvástádus earret eará dárkkistit diimmu Norggas.
Evttohan heaittit ortnega
Europa-kommišuvnna evttohii 2018 heaittihit ortnega gos ferte sirdit diimmu guktii jagis, muhto dat ii leat vuos loahpalaččat mearriduvvon.
– Mun dieđán ahte ollugiin leat oaivilat diibmosirdima birra. Jus EU dohkkeha kommišuvnna evttohusa, de besset EU-riikkat ieža mearridit háliidit go atnit geasseáiggi dahje dálveáiggi dábálaš áigin. Norga ferte maid de mearridit maid áigu dahkat, lohká Nybø.
Geasseáigi ásahuvvui máŋgga riikkas Europas vuosttaš máilmmi soađi vuolde. Áigumuš lei buorebut ávkkástallat beaivečuovgga dan áigge go olbmot dábálaččat lea gozuid alde.