NRK Meny
Normal

Muittašit Veijo Länsman konsearttain

Ihttin bearjadaga muittašuvvo sámemusihka legenda Veijo Länsman Vuollegeavgŋás Deatnogáttis.

Veijo Länsman

Veijo Länsman lei nuorra musihkkar, guhte heavvanii dušše 23-jahkásažžan suoidnemánu 16. beaivve 1974.

Foto: Dáidaga ovddidanguovddáža Lappi doaibmabáiki

1970-vuođđalogus Veijo Länsman dovde vuosttaš sámi rockártistan, ja son buvttii sámemusihka ođđa dassái.

Veijo Länsman heavvanii dušše 23-jahkásažžan 1974:s. Sus báhce olu čáppa sánit ja lávlagat árbin. Ja danne háliidit gudnejahttut su muitokonsearttain.

– Ánssášan viimmat oažžut fuomášumi

– Ii leat imaš ahte Veijo Länsman lávlagat leat báhcán eallit. Veijo lei duođaige čeahpes teakstačálli ja maiddái loaiddastii lávlagiid nu ahte dat guoskkahedje. Son čanai teavsttaide muhtin mihtilmas áššiid Sámi eallimis ja olbmuin geavahemiin veardádusgovvan olu luonddufáttáid, lohká sámemusihkkadutki ja sámemusihkar Annukka Hirvasvuopio-Laiti Ohcejogas.

Veijo Länsman ráhkadii ođđa sániid váldokultuvrra hitbihtáide iežas eatnigillii, sámegillii. Teavsttat leat čállon sámekultuvrra perspektiivvas ja dain gieđahallojit sámiide dehálaš fáttát nugo boazodoallu ja luondu. Maiddái nuorravuođa universála temát ráhkesvuohta ja friijavuohta leat su lávlagiin. Hirvasvuopio-Laiti mielas Veijo lávlagiid sánit heivejit otná beaivái maid, vaikko lávlagiid čállimis lea gollan badjel 40 jagi.

– Dát lea muhtinláhkai vuođđun dasa ahte maiddái nuorat sámebuolvvat leat váldán Veijo Länsman buvttadeami alcceset. Lea fiinnis ahte beassat ovttas muittašit Veijo Länsman guođđán árbbi dán muitokonsearttas. Son lea duođaige ánssášan dál viimmat oažžut fuomášumi, lohká Hirvasvuopio-Laiti.

Olu artisttat servet

Bearjadaga 12.6.2015 diibmu 21 muittašitge Veijo ja su musihka muitokonsearttas, mii lágiduvvo Vuollegeavgŋá Dearpmi álde, Deatnogáttis.

Konseartta ártisttat bohtet Länsmana ruovttuguovllus Deanuleagis ja sii ovdanbuktet measta buot Veijo lávlagiid.

Konsertii servet artisttat Niillas Holmberg, Ámmun Johnskareng, Hildá Länsman, Annukka Hirvasvuopio-Laiti ja Áile Risten Holmberg. Musihka lassin máŋggat ustibat muittašit Veijo eallima. Konseartta musihkkarin doibmet Roope Mäenpää ja Oula Guttorm.

Annukka Hirvasvuopio-Laiti ja Anna Näkkäläjärvi-Länsman

Annukka Hirvasvuopio-Laiti ja Anna Näkkäläjärvi-Länsman leaba mielde Veijo Länsman muitokonsearttas

Foto: Preassagovva