Ruoŧa Sámi radio bargit geain lea musihkkajoavku

Mollet joavkkus leat guhtta lahttu. Bealli joavkkus bargá dábálaččat Ruoŧa Sámeradios. Ja sii ledje vuosttaš Luo-Mus guossit geat ledje eará riikkas go prográmmajođiheaddji.

mollet
Foto: Govven: Fredric Alm

"Máilbmi jorrá" lea várra Mollet joavkku eanemus dovddus lávlla. Ja dan gullá ge sin EPs "Don dieđát min", man joavku almmuhii 2007s.

Maŋŋel dán almmuheami lea joavku čuojahan sihke Ruoŧas ja Norggas muhtun festiválain.

Eai hálit šaddat nu hirbmat beakkánat

Go Per Josef Idivuoma, Máhtte Sikku Valio ja Sámmul Idivuoma ledje guossin Luo-Mus Máilmmis, muitaledje ahte sis ii leat áigumuš šaddat dakkar hirbmat beakkán joavkun gal. Sii eanaš čuojahit somá dihte, rešket ieža, ja okta sis dadjá vel ahte sin joavku lea dakkar "baika-banda".

Muhto ovdagovat sis gal leat. Mari Boine, Trerixøset ja Intrigue. Ja Mari Boines lávlagis "In dieđe" lea ge Molelt ráhkadan iežas veršuvnna, mii lea sin EPs.

Gula movt dat lei go Per Josef, Máhtte ja Sámmul ledje studios:

Mollet studioguossin 12/9-08

(Musihkka lea čuhppojuvvon)