Moaitá struktuvrra
Dutkiidlihtu jođiheaddji Petter Aaslestad moaitá máhttoministara Torbjørn Røe Isaksena universitehta- ja allaskuvlastruktuvrra riiddu oktavuođas mii lea čuožžilan Davvi-Norggas.
Boahtte giđa galgá stuoradiggedieđáhus alit oahpahusa struktuvrra birra biddjot ovdan, muhto máhttoministtar lea rahpan vejolašvuođa oktiičaskit oahppoásahusaid Davvi-Norggas ovdal go stuoradiggedieđáhus gárvana. Dutkiidlihtu jođiheaddji oaivvilda ahte ministtar ferte eanet áiggi geavahit ovdal mearrida oktiičaskimiid, ja áigu čoahkkinastit ášši birra máhttoministariin boahtte vahku. Máhttoministtar ges lohká bealistis ahte eai sis leat gárvves struktuvrarievdadanárvalusat Davvi-Norgii.