NRK Meny
Normal

Moaitá bellodaga jođiheaddji

Finnmárkku Bargiidbellodaga sámepolitihkálaš stivrraáirras Per Ivar Henriksen moaitá dál bellodaga jođiheaddji Ingalill Olsena.

Per Ivar Henriksen
Foto: Eilif Aslaksen / NRK

Henriksen ii loga Olsena váldit Sámedikki duođaš.

Ii ovttaoaivilvuohta

Per Ivar Henriksen lea sámepolitihkálaš stivrraáirras Finnmárkku Bargiidbellodagas.

– Mon áiggun jo bearjadaga stivrračoahkkimis bivdit fylkkabellodaga digáštallat manne njunnožat fallehit Sámedikki ja sámeáirrasiid FeFo stivrras, čilge Henriksen.

Duogáš moaitagi lea go Ingalill Olsen digáštallamis ruvkkiid birra Fálesnuoris, moitti dan mo Finnmárkku opmodaga stivra lea ásahuvvon ja go FeFo stivra sámiid áirasiid eanetlogun cakkadi Wega Mining ruvkedoaibmaplánaid Fálesnuorrái.

Ii kommentere ášši

Finnmárkku Bargiidbellodaga jođiheaddji Inalill Olsen lohká NRK Sámi Radioi ahte son ii kommentere dien ášši.

Olsen vuordá ahte beassá otne ságastallat Per Ivar Henriksenin dán ášši birra.