NRK Meny
Normal

Ministtar čavge Sámi Dearvvašvuođa Siidda-prošeavtta

Norgga Dearvvašvuođaministtar dáhttu Davvi Dearvvašvuođa váldit eanet ovddasfástádusa Sámi Dearvvašvuođa Siidda ásaheami oktavuođas. SÁNÁGA-jođiheaddji mielas lea dat buorre diehtu.

bent høie

Norgga dearvvašvuođaministara Bent Høie háliida čielgasit rolla Davvi Dearvvašvuhtii mii guoská Sámi Dearvvašvuođa Siidda-prošektii.

Foto: Hedvig Bjørgum / NRK

– Mun gal lean hui ilus ahte son lea dan dahkan, ja dat lea áibbas riekta go dat lea Helse Nord gii lea ožžon dan ovddasfástádusa dan dearvvasvuođa bálvalussii sámiide, dadjá SÁNÁGA-jođiheaddji Gunn Heatta.

Heatta movttáska go Norgga dearvvašvuođaministara, Bent Høie, gáibida Davvi Dearvvašvuođa váldit eanet ovddasfástádusa Sámi dearvvašvuođa Siidda ásaheapmái.

– Háliida čielgasat rolla

Sámediggi ja sámi dearvvašvuođa njunnošat leat cuiggodan Finnmárkku Buohcciviesu rolla dán barggus, earret eará go ii vuhtiiválde sámi beroštumiid.

Dearvvašvuođa ministtar háliida Davvi Dearvvasvuhtii čielgasat rolla.

– Dat lea leamaš čielggas munnje ahte Davvi Dearvvašvuođas lea našuvnnalaš ovddasfástádus áimmahuššat sámi guoski dearvvašvuođa áššiid. Mun lean dál bivdán Davvi Dearvvašvuođa váldit eanet guovllu ovddasfástádusa Sámi Dearvvašvuođa Siidda ovdáneapmái ja sisdollui, dadjá ministtar.

Gearggus eanet sámi ovttasbargui

Davvi Dearvvašvuođa hálddahusdirektevra ii mieđit ministara cealkámuša cuiggodussan alcceseaset, muhto dadjá iežaset leat gergosat eambbo ovttasbargat sámi dearvvašvuođa ovddasteddjiiguin.

– Mii gal leat ovdal ge bargan ovttas ja son diehtá moaddása geassádan barggus, muhto doaivvun ahte soai máhccaba ruovttoluotta go dál geahčadišgoahtit Sámi Dearvvasvuođa Siidda sisdoalu, dadjá Lars Vorland.

Vorland hállá dás váldodoaktára Knut Johnsena ja SÁNÁGA-jođiheaddji Gunn Heatta birra, geat leaba geassádan prošeavttas go eaba leat duhtavaččat proseassain.

– Dat ii leat mannan ovddasguvlui. Dat lea váldán máŋga, máŋga jagi ja mii leat ain dáppe vuordimin nu ahte mun gal sávan dál ahte mii oažžut dan dearvvašvuođa Siidda nu jođánit go vejolaš.